އިންޑިއާގެ ޖުމްހޫރީީ ދުވަހުގެ ތަހުނިޔާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިންޑިއާގެ ރައީސް ދުރުޕަތީ މުރުމޫއަށާއި، ބޮޑުވަޒީރު ނަރެންދުރަ މޯދީއާއި ރައްޔިތުންނަށް އެޤައުމުގެ 77ވަނަ ޖުމްހޫރީ ދުވަހުގެ ތަހުނިޔާ އަރިސްކުރައްވާފައެވެ. 

ރައީސް ވިދާޅުވީ، މިދުވަހަކީ އިންޑިއާގެ މިނިވަންކަމާއި ޑިމޮކްރަސީ އަދި ހެޔޮވެރިކަމުގެ އަސާސްތައް ނެގެހެއްޓުމަށް އެޤައުމުގެ ރައްޔިތުން ކުރަމުންދާ މަސައްކަތާއި އެކަމަށް އޮތް ވަރުގަދަ އަޒުމް ރަަމްޒުކޮށްދޭ ދުވަހެއްކަމަށެވެ. އެމަނިކުފާނު ވަނީ ރާއްޖެއާއި އިންޑިއާގެ ރައްޔިތުންގެ ލާބަޔާއި މަންފާއަށްޓަކައި ދެޤައުމުގެ ދެމެދު އޮތް ގާތް ގުޅުން އިތުރަށް ބަދަހިކުރުމަށްޓަކައި އެކުގައި މަސައްކަތްކުރުންމަތީ ދެމިއޮތުމަށް ރާއްޖެއިން އަބަދުވެސް އެދޭކަމަށް ވިދާޅުވެފައެވެ.

އިންޑިއާގެ ޖުމްހޫރީ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޖެނުއަރީމަހުގެ 26 ވަނަ ދުވަހެވެ.

ޖުމްހޫރީ ދުވަސް އިންޑިއާއިން ފާހަގަކުރަނީ 1950 ވަނަ އަހަރު އެޤައުމުގެ ގާނޫނުއަސާސީއަށް އަމަލު ކުރަން ފެށުމުގެ މުނާސަބަތާ ގުޅިގެންނެވެ.