ސްކޭމެއްގެ ތެރެއިން މީހެއްގެ ސޯޝަލް މީޑިޔާ އެކައުންޓުތައް ހެކްކޮށްގެން ކުންފުންޏެއްގެ އެކައުންޓުން ގިނަ އަދަދެއް ފައިސާ ނެގި މައްސަލައެއްގައި ދިހަ މީހަކު ހައްޔަރުކޮށްފިއެވެ. 

ފުލުހުން މިއަދު ވެބްސައިޓުގައި މި މައްސަލާގައި ހައްޔަރުކުރި މީހުންގެ ވަނަވަރުވަނީ ހާމަކޮށްފައެވެ. އެގޮތުން މި މައްސަލައާ ގުޅިގެން ހައްޔަރުކުރި މީހުންނަކީ؛ 

ލ. އިސްދޫ / ގުޑްލައިފް، މުޙައްމަދު ޙަސަން (59އ)

ސ. ހިތަދޫ / އުދަ، އަލީ ޢިރުފާނު އަޙްމަދުދީދީ (26އ)

ސ. ހިތަދޫ / ނަންރީތިގެ، ޢަލީ ޝިރާޒު (38އ)

ހދ. ވައިކަރަދޫ / ޕެރިމްރޯޒް، ޢަބްދުﷲ ނާފިޛް (39އ)

ގއ. ކަނޑުހުޅުދޫ / ފޫހިވާގެ، މުޙައްމަދު ޢަލީ (42އ)

މ. މާލޭގެއާގެ / މާލެ، މުޙައްމަދު ނުހާދު ޢަލީ (30އ)

ހއ. ކެލާ / ޕެނަމާ، މުޙައްމަދު ސިމާދު (38އ) 

ގދ. ފިޔޯރީ / ހީނާމާގެ، އަލީ އިމްރާން (38އ)

ގދ. ތިނަދޫ / ގުލްބަކާގެ، ޢަބްދުﷲ އިސްރާޤް (19އ)

ކ. ހިންމަފުށި / މެޑޯޒް، މުޙައްމަދު އިބްރާހީމް (49އ) 

ފުލުހުން މައުލޫމާތު ދިން ގޮތުގައި މި މީހުންގެ ތެރެއިން އެކަކު ހައްޔަރުކުރީ ކ.ހިންމަފުށިންނެވެ. އަދި ތިން މީހަކު އައްޑޫން ހައްޔަރުކުރިއިރު، ދެން ތިބި މީހުން ހައްޔަރުކުރީ މާލޭ ސިޓީންނެވެ. 

އަދި މި މީހުންގެ ތެރެއިން ހަ މީހުންނަކީ ސްކޭމްކޮށްގެން ހޯދި ފައިސާ އެމީހުންގެ އެކައުންޓުތަކަށް ޖަމާކުރުމުން އެ ފައިސާ ނެގި ކަމަށް ތުހުމަތުވާ މީހުންނެވެ. އަދި އެކަކީ ސްކޭމްކޮށްގެން ހޯދި ފައިސާ އެކި ވިޔަފާރިތަކަށް ޖަމާކޮށް އެ ފައިސާއަށް މުދާ ގަން މީހެކެވެ. 

އޭގެ އިތުރުން ތިން މީހަކު ހައްޔަރުކުރީ އެކި މީހުން އޭޓީއެމްތަކަށް ގެންގޮސް، އެމީހުން މެދުވެރިކޮށް އޭޓީއެމްތަކުން ސްކޭމުކޮށްގެން ހެދި ފައިސާ ނެގުމަށްފަހު އެ ފައިސާއާ ހަވާލުވި މީހުންނެވެ. 

ފުލުހުން އިތުރަށް ތަފުސީލުކޮށްދިން ގޮތުގައި މި މީހުން ހައްޔަރުކުރީ މީހެއްގެ ސޯޝަލް މީޑިޔާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުންޏެއްގެ ބޭންކު އެކައުންޓުން 279،600 އަށްވުރެ ގިނަ ރފިޔާ ނަގާފައިވާކަމަށް ފުލުހަށް ހުށަހެޅި މައްސަލައެއްގެ ތަހުގީގުގައި ހިންގި އޮޕަރޭޝަނުގައި ކޯޓު އަމުރެއްގެ ދަށުންނެވެ. 

މި ޖަނަވަރީ މަހުގެ 21 ވަނަ ދުވަހުން ފެށިގެން ކުރިއަށް ގެންދިޔަ މި އޮޕަރޭޝަންގައި ގޭންގު ކްރައިމްއާއި ހިންމަފުށި ޕޮލިސް އަދި އައްޑޫ ސިޓީ ހިތަދޫ ޕޮލިސް ބައިވެރިވިކަމަށް ފުލުހުންގެ ހިދުމަތުން ބުނެފައިވެއެވެ. 

މި މީހުން ހައްޔަރުކުރުމަށްފަހު އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކޮށްފައިވެއެވެ. އެމީހުންގެ ތެރެއން މުހައްމަދު އިބްރާހީމް ފަސް ދުވަހަށް، މުހައްމަދު އަލީއާއި މުހައްމަދު ހަސަން ހަތް ދުވަހަށް އަދި އަލީ އިރުފާން އަހްމަދު ދީދީ ދިހަ ދުވަހަށް ބަންދުކުރަން ކޯޓުންވަނީ އަމުރުކޮށްފައެވެ. ބާކީ ތިބި ހަ މީހުން 15 ދުވަހަށް ބަންދުކުރަން ކޯޓުން އަމުރުކޮށްފައިވެއެވެ. 

ފުލުހުންގެ ހިދުމަތުގެ އެންޓި ސްކޭމް ސެންޓަރުން ބުނެފައިވާ ގޮތުން އެ ސެންޓަރު ގާއިމުކުރި ފަހުން ހިންގި ސްކޭމުތަކުގައި ގެއްލުނު ފައިސާގެ 37 އިންސައްތަ އަނބުރާ ހޯދައިދެވިފައިވެއެވެ. އަދި ސްކޭމް ސެންޓަރަށް ހުށަހެޅުނު މައްސަލަތަކުގެ ތެރެއިން ގިނަ އަދަދެއްގެ މައްސަލަތަކުގައި ހައްލުތަކެއް ފުލުހުންނަަށްވަނީ ހޯދައިދެވިފައެވެ.