މާލޭގައި އަދި ރަށުގައި ދިރިއުޅޭ މީހުންގެ ރެކޯޑު ރަސްމީކޮށް ނުބަލަހައްޓާ ކައުންސިލުތަކުން، ސަރުކާރުގެ "އާއިލީ ބޯހިޔާވަހިކަން" ސިޔާސަތުގެ ދަށުން ދޫކުރާ ގޯއްޗާއި ފުލެޓަށް ކުރިމަތިލާ މީހުންނަށް، މެދުނުކެނޑި މާލޭގައި 15 އަހަރު ދިރިއުޅުނުކަން ބަޔާންކޮށް ލިޔުން ދޫނުކުރުމަށް ލޯކަލް ގަވަމެންޓް އޮތޯރިޓީ (އެލްޖީއޭ)އިން އަންގައިފިއެވެ. 

އެލްޖީއޭއިން ކައުންސިލުތަކަށް ފޮނުވި ސިޓީއެއްގައި އެ އިދާރާއިން ބުނެފައިވަނީ މާލޭގައި 15 އަހަރަށްވުރެ ދިގު މުއްދަތެއްގަައި ދިރިއުޅުނުކަން އަންގައިދޭ ލިޔުން ދޫކުރުމަށް އެދި އެކި މީހުން ކައުންސިލުތަކުގައި އެދެމުންދާ ކަމަށެވެ. ސަރުކާރުން އާއްމުކޮށްފައިވާ ފުލެޓާއި ގޯތި ދޫކުރުމުގެ އުސޫލާ ހަވާލާދީ އެލްޖީއޭއިން ފާހަގަކުރީ ދައުލަތުގެ އިދާރާއަކުން ރަސްމީކޮށް ބަލަަހައްޓާ ލިޔެކިޔުންތަކާއި މައުލޫމާތުތަކުން އެމީހަކު މާލޭގައި ދިރިއުޅޭކަން ސާބިތުވާނަމަ، އެ މައުލޫމާތުގެ މައްޗަށް ބިނާކޮށް އެ އިދާރާއަކުން ދޫކުރާ ލިޔުން ހުށަހެޅިދާނެ ކަމަށެވެ. 

ނަމަވެސް އެ ލިޔުމެއްވާންވާނީ އެ އިދާރާއަކުން ރަސްމީކޮށް ބަލަހަައްޓަމުން އައިސްފައިވާ ލިޔެކިޔުމާއި މައުލޫމާތުން އެމީހަކު މަލޭގައި ދިރިއުޅޭކަން ސާބިތުވެގެން ދޫކުރާ ލިޔުމަކަށްކަން ފާހަގަކޮށް، އެލްޖީއޭއިން ބުނެފައިވަނީ، ސިޓީ ކައުންސިލަކުން ނުވަތަ ރަށު ކައުންސިލަކުން ބަލަހައްޓަމުން ނުދާ މައުލޫމާތެއްގެ މައްޗަށް ބިނާކޮށް އެމީހަކު މާލޭގައި ވަކި މުއްދަތެއްގަައި ދިރިއުޅުނު ކަމުގެ ލިޔުން ދޫނުކުރެވޭނެކަން ހައުސިން މިނިސްޓްރީން އާއްމުކޮށްފައިވާ އުސޫލުން އެނގޭ ކަމަށެވެ. 

"ކައުންސިލެއްގައި ބަލަހައްޓާ ރަސްމީ މައުލޫމާތުގެ މައްޗަށް ބިނާކޮށް އެ ފަރާތަކުން މާލޭގައި ދިރިއުޅުނު މުއްދަތު ސާބިތުކޮށް ނުދެވޭ ނަމަ، ކައުންސިލަކުން މިފަދަ ލިޔުމެއް އެއްވެސް ފަރާތަކަށް ދޫނުކުރުމަށް ދަންނަވަމެވެ،" އެލްޖީއޭގެ ބަޔާނުގައި ބުނެފައިވެއެވެ. 

ގެދޮރުވެރިކަމާ ބެހޭ ވަޒީރު ޑރ.އަބްދުﷲ މުއްތަލިބު ދައުލަތުގެ މީޑިޔާ ޕީއެސްއެމްއަށް މިފަހުން ދެއްވި ބަސްދީގަތުމެއްގައި ވިދާޅުވެފައިވަނީ މީހަކު މާލޭގައި 15 އަހަރު ދިރިއުޅުނުކަން ބަޔާންކޮށް ކައުންސިލުތަކުގެ ރައީސަށް ލިޔުން ދޫނުކުރެވޭނެ ކަމށެވެ. 

ސަރުކާރުންވަނީ މާލޭގައި އުޅުނުކަން ސާބިތުކުރުމަށް ހުށަހެޅޭނެ ލިޔުންތަކަށް ބޮޑެތި ލުއިތަކެއް ދީފައެވެ. އެގޮތުން ވަޒީފާއެއްގައި އުޅުނުކަން އެނގޭނެ ލިޔުންތަކާއި، މާލޭގައި އާއިލާއެއް ބިނާކުރިކަން އެނގޭނެ ލިޔުންތަކުގެ އިތުރަށް މާލޭގެ ގެއެއްގައި ދިރިއުޅުނުކަމަށް އެގެއެއްގެ ވެރިފަރާތުން ދޭ ނޯޓަރައިޒްކޮށްފައިވާ ލިޔުންވެސް ބަލައިގަންނަންވަނީ ނިންމާފައެވެ.