ރާއްޖެއާއި އޮސްޓްރޭލިއާގެ މެދުގައި ގާތް އެކުވެރިކަމަކީ ރާއްޖެއިން ވަރަށް ބޮޑަށް އަގުވަޒަންކުރާ މުހިއްމު ގުޅުމެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ފާހަގަކުރަމުންދާ އޮސްޓްރޭލިއާ ދުވަހުގެ މުނާސަބތުގައި އެކްސްގައި ޝާއިއުކުރެއްވި ޕޯސްޓުގައި ރައީސް ވިދާޅުވެފައިވަނީ އޮސްޓްރޭލިއާގެ ގަވަނާ ޖެނެރަލް ހޮނަރަބަލް ސޭމް މޮސްޓީންއާއި ބޮޑުވަޒީރު އޮނަރަބަލް އެންތަނީ އަލްބަނީސްއަށާއި އެ ގައުމުގެ ސަރުކާރާއި އެކުވެރި ރައްޔިތުންނަށް ދުވަހުގެ ތަހުނިޔާ އަރަިސްކުރައްވާ ކަމަށެވެ. 

އެއާއެކު ރައީސްވަނީ ރާއްޖެއާއި އޮސްޓްރޭލިއާގެ މެދުގައި އޮތް ގާތް އެކުވެރި ގުޅުމާއި، ރާއްޖޭގެ ތަރައްގީގައި އޮސްޓްރޭލިއާއިން އަދާކުރާ މުހިއްމު ދައުރު ފާހަގަަކުރައްވައި އެ ގައުމާ އޮތް އެ ގުޅުން ރާއްޖެއިން ވަރަށް ބޮޑަށް އަގުވަޒަންކުރާކަން ފާހަގަކުރައްވާފައެވެ. 

އަދި އޮސްޓްރޭލިއާގެ ހުރިހާ ރައްޔިތުންނަށް ކާމިޔާބަށް އެދިވަޑައިގެން އެ ގައުމަށް ކުރިއެރުމާއި ތަނަވަސްކަމުގެ އައު އުސްމިންތަކެއް ހާސިލުވުމަށް އެމަނިކުފާނުވަނީ އެދިވަޑައިގެންފައެވެ. 

އޮސްޓްރޭލިއާއާއި ރާއްޖޭގެ މެދުގައި 1974 ވަނަ އަހަރުން ފެށިގެން ޑިޕްލޮމެޓިކް ގުޅުން ގާއިމުކުރެވިފައިވާއިރު، އެ ގައުމަކީ ކޮމަންވެލްތުގެ ތެރެއިން އަދި އޮސްޓްރޭލިއާ ސަރުކާރުން ކުރިއަށްގެންދާ އެކި ޕްރޮގުރާމުތަކުގެ ތެރެއިން ރާއްޖެއަށް ގިނަ އެހީތަކެއް ވެދޭ ގައުމެކެވެ.