ރެއާއި ދުވާލު ނިދި ނަންގަވައިލައްވައިގެން ރައްޔިތުންގެ ހައްގުގައި ނުހަނު ބުރަ މަސައްކަތްތަކެއް ކުރައްވަމުން ގެންދަވާ ރައީސަަކާއެކު އެއްބާރުލުންދީގެން މަސައްކަތްކުރާނެ ކައުންސިލަރުންނާއި އަންހެނުންނަށް ތަރައްގީއަށް މަސައްކަތްކުރާ ކޮމިޓީގެ މެންބަރުން އަދި މޭޔަރަކު އިންތިހާބުކުރުމަކީ ކޮންމެހެން ކުރަންޖެހޭ ކަމެއް ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ. 

މާލެ ސިޓީގެ މާފަންނު ދެކުނު ދާއިރާގެ ކައުންސިލު ގޮނޑިއަށް ޕީއެންސީގެ ޓެކިޓުގައި ވާދަކުރައްވާ ކެންޑިޑޭޓާއި މާލޭގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާ ގޮނޑިއަށް ވާދަކުރައްވާ ކެންޑިޑޭޓުގެ ކެމްޕެއިން ޖަގަހަ ހުޅުވުމަށް މިރޭ ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ފަސްޓް ލޭޑީ ސާޖިދާ ވިދާޅުވީ މާފަންނު ދެކުނުގައި އެކަމަނާ ގިނަ ދުވަސްތަކެއް ދިރިއުޅުއްވިކަމަށާއި، ކުރިން ރަސްފަންނު އޮތް ސަރަހައްދު އޮތް ގޮތާއި، ފުޑް ކޯޓުގެ ސަރަހައްދު އޮތް ގޮތް އެ ސަރަހައްދުގެ ރައްޔިތުން ހަނދުމަފުޅު ހުންނާނެ ކަމަށެވެ. 

އެ މައްސަލަތައް ހައްލުކުރައްވައި އެތަންތަނަށް ހެޔޮ ބަދަލުތަކެއް ގެނެސްދެއްވީ ކޮން ބޭފުޅެއްގެ މޭސްތެރިކަމުގައިކަން ރައްޔިތުންނަށް އެނގޭނެކަން ފާހަގަކުރައްވަަމުން، ރައީސް ޑރ.މުޢިއްޒު ހައުސިން މިނިސްޓަރުކަމުގައި ހުންނެވިއިރު މާލޭގެ އެ ސަރަހައްދަށް ގެނެސްދެވި ބަދަލުތައް އެކަމަނާ ވިދާޅުވެދެއްވިއެވެ. އަދި މާލޭގެ މޭޔަރުކަމުގައި އެ ސަރަހައްދަށް ކުރިއެރުން ގެެނެސްދެއްވުމަށް ރައީސް ކުރެއްވި މަސައްކަތްޕުޅުވެސް ފާހަގަކުރެއްވިއެވެ. 

"މިފަދަ ވެރިއެއް ވަކި ސިޔާސަތުތަކަކާއެކު އައިސް ރައްޔިތުންނަށްޓަކައި އެތައް މަސައްކަތްތަކެއް ކޮށްދިނުމަށް ރެއާއި ދުވާލު ނުނިދައި މިއަދުވެސް މަސައްކަތްކުރާ ވެރިއަކާއެކީގައި މަސައްކަތްކުރާނެ ކައުންސިލަރުންތަކެއް ޑަބްލިއުޑީސީއެއް މޭޔަރެއް ހޮވުމަކީ ކޮންމެހެން ކުރަންޖެހޭނެ ކަމެއް،" ސާޖިދާ ވިދާާޅުވިއެވެ. 

އަދި ފުރަތަމަ ވިސްނުމުގައިވެސް ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި މަގާމަށް އަންނަ ބަޔަކު، މަގާމުގައި ތިބެގެން ސަރުކާރަށް އެއްބާރުލުން ނުދޭނަމަ، އެމީހުންގެ ފަރާތުން ރައްޔިތުންނަށް ލިބޭނެ ފައިދާއަކީ ކޮބައިތޯ ސުވާލުކުރައްވަމުން ސާޖިދާ ވިދާޅުވީ އެފަދަ ބައެއްގެ ފަރާތުން އެއްވެސް ފައިދާއެއް ނުލިބޭނެ ކަމަށެވެ. 

ފަސްޓް ލޭޑީ އިތުރަށް ފާހަގަކުރެއްވީ ރާއްޖޭގައި ހުރި އިޖުތިމާއީ އިގުތިސާދީ މައްސަލަތައް ހައްލުކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާ ކަމެވެ. އަދި އެ މައްސަލަތައް ހައްލުކުރެއްވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އުދަގޫ އެތައް ނިންމެވުމެއް ނިންމަވަމުންދާއިރު، އެމަނިކުފާނާއި ސަރުކާރަށް އެހީތެރިވެދޭނެ ބަޔަކު ކައުންސިލުތަކަށް ނުހޮވައިފިނަމަ އެކަމުގެ ގެއްލުން ހުރިހާ ރައްޔިތުން ތަހައްމަލުކުރާނެ ކަމަށްވެސް އެކަމަނާ ވިދާޅުވިއެވެ. 

ކައުންސިލަކީ ރައްޔިތުންގެ އިހުސާސްތައް އެންމެ ކައިރިން ދެނެގަނެ، އެންމެ ގާތުން ރައްޔިތުންނަށް ހިދުމަތް ފޯރުކޮށްދެވޭނެ މުއައްސަސާކަން ފާހަގަކުރައްވަމުން ސާޖިދާ ވިދާޅުވީ ރައްޔިތުންގެ ކަންބޮޑުވުންތަކާއި ބޭނުންތައް ސީދާ ސަރުކާރާ ހަމައަށް ގެނެސްދެވޭނެ ބަޔަކު ކައުންސިލުތަކުގައި ތިބުމަކީ އެކަމުން ރައްޔިތުންނަށް ވަރަށް ބޮޑަށް ފައިދާކުރާނެ ކަމެއް ކަމަށެވެ. 

މާލެ ސިޓީގެ މޭޔަެރުކަމަށް ކޮންގުރެސް ޕާޓީން ވާދަކުރައްވާ މޫސާ އަލީ ޖަލީލު ނޮވެންބަރު 3 1988 ގައި ވެވަޑައިގެންނެވި ގުރުބާނީއާއި ދެއްކެވި ހިތްވަރު ފާހަގަކުރައްވަމުން ސާޖިދާ ވިދާޅުވީ އެފަދަ ގުރުބާނީއެއް ގައުމަށްޓަކައި ވެވަޑައިގަތް ބޭފުޅެއްގެ ހިތްޕުޅުގައި ގައުމަށް އޮންނާނެ ލޯތްބާއި، ގައުމަށްޓަކައި މަސައްކަތްކުރައްވާނެ ގޮތް އެއްވެސް މީހަކަށް ނޯޅޭނެ ކަމަށެވެ. 

"އެފަދަ ބޭފުޅެއްގެ ހިތުގައި ގައުމަށްޓަކައި އޮންނާނެ ލޯތްބާއި، އެފަދަ ބޭފުޅަކު ގައުމަށްޓަކައި ކޮށްދެއްވާނެ މަސައްކަތްތައް އަޅުގަނޑުމެން ކޮންމެ މީހަކު ވިސްނަންޖެހޭނެ. އެފަދަ ބޭފުޅަކު ގައިމުވެސް ގައުމަށް ޣައްދާރުނުވާނެކަން އެނގެންޖެހޭ،" ސާޖިދާ ވިދާޅުވިއެވެ. 

ފަސްޓް ލޭޑީ ވާހަކަފުޅު ނިންމަވައިލެއްވީ، ކުރިން އެކަމަނާގެ ވާހަކަފުޅުގައި ފާހަގަކުރެއްވި ކަންކަމަށް ރިއާޔަތްކޮށް،  ކޮންގުރެސް ޕާޓީގެ މެންބަރުންގެ އިތުރަށް ވަކި ޕާޓީއަކަށް ނިސްބަތްނުވާ މީހުންނާއި ވާދަވެރި ޕާޓީތަކުގެ އާއްމު މެންބަރުންވެސް ކުރިއަށް އޮތް ލޯކަލް ކައުންސިލު އިންތިހާބުގައި ކޮންގްރެސް ޕާޓީގެ ކެންޑިޑޭޓުންނަށް ވޯޓު ދިނުމަށް އިލްތިމާސްކުރައްވަމުންނެވެ.