ހުޅުމާލޭގެ މަގުތަކުގައި އެކްސިޑެންޓްތައް މަދުކުރުމަށްޓަކައި ހަދާފައިވާ ބުރުގެ މެދުގައި ބަހައްޓާނެ މޮނިއުމެންޓްތައް ހެދުމަށް ހުޅުވާލި މުބާރާތުގެ އެއްވަނަ ހާސިލުކުރީ އާޓީފިޝަލް އިންޓެލިޖެންސް (އޭއައި)ގެ އެހީގައި ހަދާފައިވާ ޑިޒައިންތަކެއް ކަމަށް ޝައްކު ކުރެވުމުން، އެ ޑިޒައިންތަކުގެ ސައްޙަކަން ބެލުމަށްޓަކައި އަލުން އެ ޑިޒައިންތައް މުރާޖާކުރުމަށް އެޗްޑީސިއިން ނިންމައިފިއެވެ.

ހުޅުމާލޭގެ 17 ސަރަހައްދެއްގައި ބަހައްޓާ މޮނިއުމެންޓްތަކުގެ ޑިޒައިން ހެދުމަށް މިދިޔަ ސެޕްޓެމްބަރު މަހުގެ އެޗްޑީސީއިން ވަނީ ހުޅުވާލާފައެވެ. މި މުބާރާތުގެ ތީމަކީ "ދިވެހިންގެ ރާއްޖެ" އެވެ. އަދި އެ މުބާރާތުގެ އެއްވަނަ އަށްދާ ޑިޒައިނަކަށް 100،000ރ ގެ އިނާމެއް ހުށަހަޅާފައެވެ.

ނަމަވެސް އިއްޔެ މުބާރާތުގެ އެއްވަނައަށް ހޮވުނު ޑިޒައިން އިއުލާނު ކުރުމުން ސޯޝަލް މީޑިއާގައި ގިނަ ބަޔަކު ނުރުހުން ފާޅުކޮށް އެއީ އޭއައި ޖެނެރޭޓެޑް ޑިޒައިނެއް ކަމަށް ތުހުމަތު ކުރިއެވެ. އަދި އެކުރެހުމަށް އެއްވަނައިގެ އިމާނު ދިނުމަކީ އެންމެ އިންސާފުވެރި ގޮތް ނޫން ކަމަށްވެސް ގިނަ ބަޔަކު ބުނަމުން ދިޔައެވެ.

އެޗްޑީސީއިން އާންމުކުރި ބަޔާނެއްގައި ބުނެފައިވަނީ  މުއްދަތު ހަމަވިއިރު، ޖުމްލަ ހަތް ފަރާތަކުން ޑިޒައިން ހުށަހަޅާފައިވާ ކަމަށެވެ. އަދި އެ ހުށަހެޅުންތަކުގެ ތެރެއިން ވަނަ ހޮވާފައި ވަނީ އެކަމަށް ކަނޑައެޅި ޕްރޮފެޝަނަލް ސްޓާފުންގެ ޖަޖުންގެ ޕެނަލަކުން ހުށަހެޅުންތައް އިވެލުއޭޓް ކުރުމަށްފަހު ކަމަށް އެޗްޑީސީން ބުންޏެވެ.

 "ނަމަވެސް ދެންނެވުނު މުބާރާތުގެ އެއް ވަނައަށް ދިޔަ މޮނިއުމެންޓް ޑިޒައިންތަކަކީ އޭއައި ޖެނެރޭޓެޑް ޑިޒައިންތަކެއް ކަމަށް ބުނެ އާންމުންގެ ޝަކުވާ މި ކޯޕަރޭޝަނަށް ލިބުމާ ގުޅިގެން އެ ޝަކުވާތައް އިތުރަށް ބަލައި ވަނަ ލިބުނު ޑިޒައިންތައް ރިވިއު ކުރުމުގެ މަސައްކަތް މި ކޯޕަރޭޝަނުން ކުރަމުންދާ ވާހަކަ ދަންނަވަމެވެ،" އެ ބަޔާނުގައިވެއެވެ. އަދި އެކުންފުނީގެ އަމާޒަކީ އެކުންފުނީގެ ހުރިހާ މަސައްކަތަކީވެސް ދެފުށް ފެންނަ އިންސާފުވެރި މަސައްކަތް ތަކަކަށް ހެދުން ކަމަށެވެ.