އެޗްޑީސީގެ ދަށުން ހިނގަމުން އައި ސޯޝަލް ހައުސިންގ އާ ގުޅުންހުރި ހުރިހާ މަސައްކަތެއް ފަހި ދިރިއުޅުން ކޯޕަރޭޝަން (އެފްޑީސީ)ގެ ދަށަށް ބަދަލުކުރަން ނިންމައިފިއެވެ.

ސޯޝަލް ޕްރޮޖެކްޓްތައް އެފްޑީސީއަށް ހާއްސަކުރުމުގެ ބޭނުމަކީ ސޯޝަލް ހައުސިންގ މަޝްރޫއުތައް މިހާރަށް ވުރެ ރަނގަޅަށް ދިރާސާކޮށް، އެކަމާ ގުޅޭ އެންމެހާ ކަންކަމުގައި ފޯކަސް ގެއްލުވާނުލައި ސީދާ އެފަދަ މަޝްރޫއުތައް ހިންގުމަށް ކަމަށް އަންނަ އަހަރަށް ލަފާކުރާ ބަޖެޓުގައި ބަޔާންކޮށްފައިވެއެވެ. އަދި ސަރުކާރުން އެފްޑީސީއަށް ކުރާ ޙަރަދުތައް ކުޑަކޮށް ސަރުކާރަށް ބަރޯސާނުވެ ހިނގާ ހަރުދަނާ ކުންފުންޏަކަށް ހެދުމަށްޓަކައި އެ ކުންފުނި އެޗްޑީސީގެ ދަށުން ހިންގުމަށް ވަނީ ހަމަޖައްސައިފައެވެ.

އެޗްޑީސީއަކީ 2009 ވަނަ އަހަރު ހުޅުމާލެ ތަރައްޤީކުރުމަށްޓަކައި އުފެއްދި ކުންފުންޏެކެވެ. އެހެން ނަމަވެސް 2005 ގައި ހައުސިންގ ޕްރޮޖެކްޓްތައް ހިންގުމަށް އެ ކުންފުނި ހާއްސަވެގެން ދިޔައެވެ. އޭގެ ފަހުން އެކުންފުނިން އަންނަނީ ހުޅުމާލެ ތަރައްޤީ ކުރުމުގެ އިތުރުން ކޮމާޝަލް އަދި ސޯޝަލް މަޝްރޫޢުތަކެއް ހިންގަމުންނެވެ.

އެފްޑީސީ ކުންފުންޏެއް ގޮތުގައި އެކުލަވައިލީ ސޯޝަލް މަޝްރޫޢުތައް ހިންގުމަށްޓަކައި 2019 ވަނަ އަހަރުއެވެ. އެ ކުންފުނިން މިހާރުވެސް ދަނީ ހުޅުމާލޭގައި 4000 ފްލެޓު އެޅުމުގެ މަސައްކަތްކުރަމުންނެވެ.

މިހާރަށް ވުރެ ބޮޑަށް ސޯޝަލް ހައުސިންގެ ޒިންމާތައް ނެގުމުގައި އެޗްޑީސީން ހަރުދަނާކުރުމަށްޓަކައި އިނީޝަލް ޕަބްލިކް އޮފަރިން (އައިޕީއޯ) އަކަށް ގޮސް، އާންމުންނަށް ހިއްސާ ވިއްކޭ ފަދަ ކުންފުންޏަކަށް ހެދުމުގެ ފުރުސަތު އެޗްޑީސީއަށް ފަހިކޮށްދޭނެ ކަމަށް ފިނޭންސް މިނިސްޓްރީން ބުންޏެވެ.

އަންނަ އަހަރު ސަރުކާރުގެ ކުންފުނިތައް ރީފޯމުކުރުމަށްޓަކައި ހަރަދު ކުޑަ މަސައްކަތްތަކެއް ކުރުމަށް އަންނަ އަހަރުގެ ބަޖެޓުގައި ފިނޭންސް އިން ވަނީ ހިމަނައިފައެވެ.