ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ރިފޯމްކުރުމަށް ސަރުކާރުން ކުރި މަސައްކަތުން މަހެއްގެ މައްޗަށް 18 މިލިއަނާއި 20 މިލިއަނާ ދެމެދުގެ އަދަދަކަށް ޚަރަދު ކުޑަކުރެވިފައިވާ ކަމަށް އެ ކުންފުނީގެ މެނޭޖިން ޑިރެކްޓަރ ބްރިގޭޑިއަރ ޖެނެރަލް ރިޓަޔަރޑް ޢަލީ ޒުހައިރު ވިދާޅުވެއްޖެއެވެ.

ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމްގައި ވާހަކަ ދައްކަވަމުން އެމްޑީ ވިދާޅުވީ، ކުންފުންޏާ ހަވާލުވެ އެންމެ ފުރަތަމަ މަސައްކަތް ފެށީ ކުންފުނި އޮތް ހާލަތުން އެހެން ހާލަތަކަށް ބަދަލުކޮށްލެވޭނެ ގޮތްތަކެއް ހޯދުމަށް ކަމަށެވެ. އެގޮތުން ކުންފުނީގެ ބޯޑާއި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑާ (ޕީސީބީ) މަޝްވަރާކޮށްގެން ކުންފުނި ރިފޯމް ކުރުމުގެ މަސައްކަތް ފެށި ކަމަށް އޭނާ ވިދާޅުވިއެވެ.

ކުންފުނި ރިފޯމް ކުރުމުގެ މަސައްކަތުގެ ދަށުން ކުރި އެންމެ މުހިންމު އެއްކަމަކީ ހިންގުމުގެ ޚަރަދު ކުޑަކުރުން ކަމަށާއި، އެގޮތުން ކުންފުންޏަށް ތަކެތި ގަންނާނެ ވަކި އަގުތަކެއް ކަނޑައެޅިގެން ދިޔަކަމަށް އޭނާ ވިދާޅުވިއެވެ. މީގެ އިތުރުން، ކުންފުނީގެ ޚަރަދު ކުޑަކުރުމަށް، އިތުރު ގަޑި ލިބޭ ގޮތުގެ ކޮންޓްރޯލް މެކޭނިޒަމެއް ކަނޑައެޅި، އާރުޑީސީއަކީ ރަސްމީކޮށް ހަ ދުވަހު މަސައްކަތްކުރާ ކުންފުންޏެއްގެ ގޮތުގައި ބަދަލުކޮށްފައިވާ ކަމަށް ވެސް ވިދާޅުވިއެވެ.

އާރުޑީސީގެ އެމްޑީ ވިދާޅުވީ، މި ސަރުކާރުން ވެރިކަމާ ހަވާލުވިއިރު ހުއްޓިފައިވާ 17 ޕްރޮޖެކްޓެއް މިހާރު ފަށައިގެން ކުރިއަށްދާ ކަމަށާއި، އިތުރު 10 ޕްރޮޖެކްޓެއްގެ މަސައްކަތް ވެސް ކުރިއަށްދާ ކަމަށެވެ.