ވިޔަފާރި ދަށްވެ ހުޅުމާލޭ ކޭއެފްސީ އާއި ޕިއްޒާ ހަޓް ބަންދުކޮށްފި އެވެ. 

މައުލޫމާތު ލިބޭގޮތުގައި އެ ދެތަން ބަންދުކުރީ ވިޔަފާރި ވަރަށް ބޮޑަށް ދަށްވުމާ ގުޅިގެންނެވެ. ނަމަވެސް އެކަމާ ގުޅޭ ގޮތުން ކޭއެފްސީ އާއި ޕިއްޒާ ހަޓް ރެސްޓޯރެންޓަށް ގުޅުމުން ވަކި ސަބަބެއް ނުބުންޏެވެ.

ހުޅުމާލޭ ފެރީ ޓާމިނަލް ކައިރީ ހުންނަ ރަށު މާރުކޭޓްގެ މަތީގައި ކޭއެފްސީ އާއި ޕިއްޒާ ހަޓްގެ އައުޓްލެޓް ހުޅުވީ މިދިޔަ ހަރު އޭޕްރީލް މަހު އެވެ.

މި ދެ ކުންފުނީގެ ވިޔަފާރި ދަށްވާން ފެށީ ފަލަސްތީނުގެ ޣައްޒާގައި އިޒްރޭލުން ދެމުން ގެންދާ ހަމަލާތަކާ ދެކޮޅުހަދައި، އިޒްރޭލާ ގުޅުން އޮންނަ ވިޔަފާރިތައް ބޮއިކޮޓްކުރުމަށް މުޅި ދުނިޔޭގައި ފެށި ކެމްޕެއިނުގައި، ރާއްޖޭގެ ބައެއް މީހުން ވެސް ބައިވެރިވެ ކޭއެފްސީ އާއި ޕިއްޒާ ހަޓް ބޮއިކޮޓްކޮށް މުޒާހަރާކުރަން ފެށުމާ ގުޅިގެންނެވެ.

މި ކެމްޕެއިން ކުރިއަށް ގެންގޮސް މާލޭގައި ހުންނަ ކޭއެފްސީ އައުޓްލެޓްގެ ބިއްލޫރިގަނޑު ތަޅާލައި ގެއްލުން ވެސް ދީފައިވެ އެވެ. 

މާލޭގެ ދެ އައުޓްލެޓް ދަނީ އަދިވެސް ހިންގަމުންނެވެ.