ތުރުކީއާ އެކު ޤާއިމްކުރި މިނިވަން ވިޔަފާރީގެ އެއްބަސްވުމަށް އަންނަ އަހަރުގެ ފުރަތަމަ ކުއާޓަރުގައި އަމަލުކުރަން ފަށާނެ ކަމަށް އިޤްތިޞާދީ ތަރައްޤީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމްނިއުސްއިން ގެނެސްދޭ ހަފްތާ52 ޕްރޮގްރާމުގައި ވާހަކަދައްކަވަމުންނެވެ. ދިވެހި ރާއްޖެ އާއި ތުރުކީއާ ދެމެދު ވިޔަފާރީގެ ގުޅުން ބަދަހި ކުރުމަށްޓަކައި، މިނިވަން ވިޔަފާރީގެ އެއްބަސްވުމެއްގައި ސޮއިކޮށްފައި ވަނީ މި މަހުގެ 4 ވަނަ ދުވަހުއެވެ.

ވަޒީރު ސަޢީދު ވިދާޅުވި ގޮތުގައި މި އެއްބަސްވުމަކީ ދިވެހި ވިޔަފާރިވެރިންނަށް ބޮޑެތި ފައިދާތަކެއް ލިބިގެންދާނެ ކަމެކެވެ.

"ވަރަށް ގިނަ އަދަދެއްގެ މުދާ ތުރުކީވިލާތުން ރާއްޖެ ގެނޭ. އެ މުދާ، ޑިއުޓީ ފްރީވެގެންދާނެ، މިއީ އިންވެސްޓަރުންނަށާއި ރިސޯޓު ތަރައްޤީކުރާ ފަރާތްތަކަށާއި އާއްމު ވިޔަފާރިވެރިންނަށް ލިބިގެންދާނެ ވަރަށް ބޮޑު ކުރިއެރުމެއް،" ވަޒީރު ވިދާޅުވިއެވެ.

މި އެއްބަސްވުމުގެ ދަށުން ތުރުކީވިލާތަށް އެކްސްޕޯޓްކުރާ މަހުގެ ބާވަތްތަކަށް ލުއި ހޯދައިދިނުމުގެ އިތުރުން ވިޔަފާރީގެ ހުރަސްތައް ކުޑަކުރެވި، ދެ ޤައުމުގެ މެދުގައި ވިޔަފާރީގެ ގުޅުން ވަރުގަދަ ކުރުމާއި، ރާއްޖެ އާއި ތުރުކީވިލާތާ ދެމެދު ކުރެވޭ ވިޔަފާރި އިތުރުކުރުމަށް މަގުފަހިވެގެންދާނެ ކަމަށް ސަރުކާރުން ބުނެއެވެ.

މީގެ އިތުރުން، ޗައިނާއާ އެކު ވެފައިވާ މިނިވަން ވިޔަފާރީގެ އެއްބަސްވުމަށް އަންނަ ޖެނުއަރީ މަހުގެ 1 ވަނަ ދުވަހު އަމަލުކުރަން ފެށުމަށް ސަރުކާރުން ދަނީ ތައްޔާރުވަމުންނެވެ.

ވަޒީރު ސަޢީދު ވިދާޅުވީ މިއީ ވެސް ވިޔަފާރިވެރިންނަށް ލިބިގެންދާނެ ވަރަށް ބޮޑު ކުރިއެރުމެއް ކަމަށެވެ.

"ޗައިނާއިން ރާއްޖެ އެތެރެކުރާ މުދަލުގެ 95 އިންސައްތައާ ހަމައަށް ޑިއުޓީ ކުޑަކުރެވިގެންދާނެ،" ވަޒީރު ވިދާޅުވިއެވެ.

މި އެއްބަސްވުންތަކަކީ ދިވެހި ވިޔަފާރިވެރިންނަށާއި އާންމު ރައްޔިތުންނަށް ފައިދާކުރާނެ ކަމެއްގެ ގޮތުގައި ސަރުކާރުން ދެކެއެވެ. އަދި މިއީ ރާއްޖޭގެ އިޤްތިޞާދު ކުރިއެރުވުމަށް އެޅޭ މުހިންމު ފިޔަވަޅެއް ކަމަށް ސަރުކާރުން ބުނެއެވެ.