ރާއްޖެ އާއި އިންޑިއާއާ ދެމެދު ފައިސާގެ މުއާމަލާތްތައް ކުރުމަށް އެއް ގައުމުން އަނެއް ގައުމުގެ ފައިސާ ބޭނުންކުރުމާ ގުޅޭ ގޮތުން މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ރިޒާވް ބޭންކް އޮފް އިންޑިއާ (އާރުބީއައި) އާ ދެމެދު އެމްއޯޔޫއެއްގައި އިއްޔެ ސޮއިކޮށްފި އެވެ.

މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އެމްއެމްއޭގެ ގަވަރުނަރު އަހުމަދު މުނައްވަރެވެ. އިންޑިއާގެ ފަރާތުން އާރުބީއައިގެ ގަވަރުނަރު ޝްރީ ޝަކްތިކަންތާ ދާސް އެވެ.

އާރްބީއައި އިން ބުނީ މި އެމްއޯޔޫގެ ދަށުން ކަރަންޓް އެކައުންޓް އަދި ކެޕިޓަލް އެކައުންޓް ޓްރާންސްސެކްޝަންތަކާއި  އިގްތިސާދީ މާލީ މުއާމަލާތްތައް ދެ ގައުމުން އެއްބަސްވާ ގޮތެއްގެ މަތިން ދިވެހި ރުފިޔާ އާއި އިންޑިއަން ރުޕީސް އިން ކުރުމަށް ވަނީ ނިންމައިފަ އެވެ. އަދި އިންޑިއާގެ މުދަލާއި ހިދުމަތް އިމްޕޯޓުކޮށް އެކްސްޕޯޓު ކުރުމުގައި ދިވެހި ރުފިޔާ އަދި އިންޑިއަން ރުފީސް ބޭނުން ކުރެވޭނެ އެވެ. މިއީ އާރްބީއައި އާއި އެމްއެމްއާ ދެމެދު އެއްބާރުލުން އިތުރުކޮށްދިން މުހިންމު އެމްއޯޔޫއެއް ކަމަށް ވެސް ވަނީ ބުނެފައެވެ.

އެމްއެމްއޭ އިން ބުނީ މި އެއްބަސްވުމާ އެކު އިންޑިއާ އިން މުދާ އިމްޕޯޓްކުރާ އިރު ޑޮލަރަށް ބަރޯސާވާން ޖެހޭ މިންވަރު ކުޑަކުރެވޭނެ ކަމަށެވެ. ނަތީޖާއެއްގެ ގޮތުން ރާއްޖޭގެ ފޮރިން އެކްސްޗޭންޖް ރިޒާވަށް ހެޔޮ ބަދަލުތަކެއް އަންނާނެ ކަމަށް ވެސް ބުނެފައިވެއެވެ.

އިންޑިއާ އާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެ ގައުމަކަށް ނިސްބަތްވާ ފައިސާއިން ކުރަން މަގުފަހިކުރުމަށް ރާއްޖެ އާއި އިންޑިއާއާ ދެމެދު 400 މިލިއަން ޑޮލަރު އަދި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއްގައި ސޮއިކޮށްފައި ވަނީ މިދިޔަ މަހު ރައީސް ޑޮކްޓަރ މުހައްމަދު މުއިއްޒު އިންޑިއާއަށް ކުރެއްވި ދަތުރުފުޅުގަ އެވެ.