އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ދަށުން ހިންގަމުންދާ އަމާންވެށިތަކާއި އަމާންހިޔާތަކުގައި، ދައުލަތުގެ ބެލުމުގެ ދަށުގައި ތިބި ނާޒުކު ފަރާތްތަކަށް އެހީތެރިވުމުގެ ގޮތުން ދިރާގުން ފޯރުކޮށްދެމުން ގެންދާ ހައި ސްޕީޑް އިންޓަނެޓް 2025 ވަނަ އަހަރަށް ވެސް ދިރާގުގެ ސީއެސްއާރު ގެ ދަށުން ފޯރުކޮށްދޭން ނިންމައިފިއެވެ.

ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ ދަށުން، ރާއްޖޭގެ 10 ރަށެއްގައި ހުރި އަމާންހިޔާތަކާއި އަމާންވެށިތަކަށް ހައި ސްޕީޑް އިންޓަރނެޓު ފޯރުކޮށްދިނުމަށް ވަނީ ނިންމައިފައެވެ. މި ރަށްތަކުގެ ތެރޭގައި ބ. އޭދަފުށި، ށ. ފުނަދޫ، ހއ. ދިއްދޫ، ދ. ކުޑަހުވަދޫ، ލ.ފޮނަދޫ، ނ.މަނަދޫ، ޅ. ނައިފަރު، ފުވައްމުލަށް ސިޓީ، ކުޅުދުއްފުށީ ސިޓީ އަދި އައްޑޫ ސިޓީ ހިމެނެއެވެ.

މި ޕްރޮގްރާމްގެ މައިގަނޑު މަޤްސަދަކީ މުޅި ރާއްޖޭގެ ޑިޖިޓަލް ލިޓްރޭސީ ކުރިއަރުވާ، ދައުލަތުގެ ބެލުމުގެ ދަށުގައިވާ ކުދިންގެ ތަޢުލީމީ ބޭނުންތަކަށް ދިރާގުން އެހީތެރިކަން ފޯރުކޮށްދިނުމެވެ.

މި މުހިންމު މަޝްރޫޢުއާ ގުޅޭގޮތުން މަޝްވަރާކުރުމަށް ދިރާގުގެ އިސް ވެރިން ވަނީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ވަޒީރު ޑރ. އައިޝަތު ޝިހާމްއާ ބައްދަލުކުރައްވައި ވާހަކަ ދައްކަވައިފައެވެ. މި ބައްދަލުވުމުގައި ދެ ފަރާތުން ގުޅިގެން ކުރިއަށް ގެންދެވިދާނެ އިތުރު ހަރަކާތްތަކާ ބެހޭގޮތުން ވެސް މަޝްވަރާކުރެވުނެވެ.