އުރީދޫ މޯލްޑިވްސްގެ ފަރާތުން "އުރީދޫ ފަން ރަން 2024" ގެ ޖާޒީ، އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމަށް ރަސްމީކޮށް ހަވާލުކޮށްފިއެވެ.

މި ހަރަކާތަކީ އިޖުތިމާޢީ ގުޅުން ބަދަހިކޮށް، އެކުވެރި މާހައުލެއްގައި ކަސްރަތު ކުރުމަށް ބާރުއަޅައި، އެކަމަށް ފުރުޞަތު ފަހިކޮށްދިނުމުގެ މަޤްޞަދުގައި ކުރިއަށްގެންދާ ޙަރަކާތެކެވެ.

މިއަހަރުގެ "އުރީދޫ ފަން ރަން"، ޑިސެމްބަރު 20 ގައި ބޭއްވުމަށް ވަނީ ހަމަޖެހިފައެވެ. މި ހަރަކާތުގައި ފިޔަވަތީގެ ކުދިން ބައިވެރިވާނެ ކަމަށް އުރީދޫ މޯލްޑިވްސްއިން މަޢުލޫމާތު ދީފައިވެއެވެ.

މި ހަރަކާތަކީ އުރީދޫއިން ކޮންމެ އަހަރަކު ވެސް ކުރިއަށްގެންދާ ޚާއްޞަ ހަރަކާތެއް ކަމަށްވާއިރު، މިއަހަރުގެ ހަރަކާތުގައި ފިޔަވަތީގެ ކުދިން ބައިވެރިވުމަކީ އެ ކުދިންނަށް ލިބިގެންދާނެ އުފާވެރި ތަޖުރިބާއެއް ކަމުގައި ބެލެވެއެވެ.

އުރީދޫ ފަން ރަން 2024 އަކީ ޞިއްޙަތަށް ފައިދާހުރި ދިރިއުޅުމެއް އުޅުމަށް ހިތްވަރު ދިނުމުގެ އިތުރުން، މުޖުތަމަޢުގެ އެކި ފަންތީގެ މީހުން އެއްތަނަކަށް ޖަމާކޮށް، އިޖުތިމާޢީ ގުޅުން ބަދަހިކުރުމަށް މަގުފަހިކޮށްދޭ ހަރަކާތެއް ކަމުގައި އުރީދޫއިން ފާހަގަކޮށްފައިވެއެވެ.