ވެލާނާ އިންޓަރނޭޝަނަލް އެއަރޕޯޓުގެ ޑިޕާޗާ ޓާމިނަލުން ސިނގިރޭޓް ކާޓަންތަކެއް ބޭރުކުރަން އުޅުނު މައްސަލާގައި ހައްޔަރު ކުރި މީހުންގެ ތެރެއިން އެކަކު ފުލުހުންގެ ވަޒީފާއިން ސަސްޕެންޑް ކޮށްފި އެވެ.

އެ މައްސަލާގައި ހައްޔަރު ކޮށްފައި ވަނީ މ. ސިލްވާނެސްޓް އަހްމަދު އަފްޞަލް އާއި ޔޫސުފް ނަޛީރު އެވެ.

ފުލުހުން ބުނީ މި މައްސަލައާ ގުޅިގެން މި ދެ މީހުން ހައްޔަރު ކުރި ނަމަވެސް، ފަހުން އެ ދެ މީހުން ކޯޓުން ވަނީ ދޫކޮށްލާފަ އެވެ. އެ ދެ މީހުން ދޫކޮށްލީ ޝަރުތުތަކެއް ކުރުމަށް ފަހު އެވެ.

މި މައްސަލައާ ގުޅިގެން ނަޛީރު، ފުލުހުންގެ ވަޒީފާއިން ސަސްޕެންޑް ކޮށްފައިވާ ކަމަށް ބުންޏެވެ. އޭނާ އަކީ ފުލުސް ސާޖެންޓެކެވެ. އޭނާ ސަސްޕެންޑް ކުރީ މުސާރަ ނުލިބޭ ގޮތަށް ކަމަށް ވެސް ބުންޏެވެ.

ކަސްޓަމުން ރޭ ބުނީ ވީއައިއޭ ޑިޕާޗާ ޓާމިނަލުން ނެރެގެން ގެންދަން އުޅުނު ޑަސްބިން ބޭގްތަކެއް ކަސްޓަމްސް އިން ޗެކް ކުރި އިރު، ސިނގިރެޓް ކާޓަންތަކެއް ފެނުނު މައްސަލައެއް ތަހުޤީޤު ކުރަމުންދާ ކަމަށެވެ. އިތުރު ތަފްސީލެއް ނުދެ އެވެ.

ކަސްޓަމުން އެތަކެތި ހިފަހައްޓާ މަންޒަރު ފެންނަ ވީޑިއޯއެއް ވަނީ އާންމުވެފަ އެވެ.

ދުންފަތް ކޮންޓްރޯލްކުރުމުގެ ޤާނޫނުގެ ދަށުން ދުންފަތުގެ ބާވަތެއް އުފައްދަން ބޭނުންކުރާ އާލާތްތައް އެތެރެ ކުރުން އެއީ ޤާނޫނުން މަނާ ކަމެކެވެ.

އެފަދަ އާލާތެެއް އެތެރެކޮށްފިނަމަ އެއެއްޗެއް ހިފަހައްޓައި ނައްތާލުމަށް ސިއްހީ ވުޒާރާއިން ވަނީ މީގެކުރިން ކަސްޓަމްސްއަށް އަންގައިފައެވެ.