މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ޗާޕްކޮށްފައިވާ 100 ރުފިޔާގެ ނޫޓު މި މަހުގެ 19 ވަނަ ދުވަހު ތަޢާރަފުކުރުމަށް ނިންމަވައިފިއެވެ.

އާ ޑިޒައިނުގައި އެންމެ ބޮޑަށް ފާހަގަވަނީ ދިވެހި ރުފިޔާގެ ނިޝާން ހިމަނާފައިވުމެވެ. މައިގަނޑު ގޮތެއްގައި ނޫޓުގެ ޑިޒައިނަށް ބަދަލެއް ނާދެ އެވެ.

މި އާ ނޫޓުގެ ޚާއްޞަ ކަންތައްތަކުގެ ތެރޭގައި، ރުފިޔާގެ ނިޝާން ނޫޓުގެ ދެ ފަރާތުގައި ހިމަނާފައިވުމުގެ އިތުރުން، މިއީ ރުފިޔާގެ ނިޝާން ތަޢާރަފުކުރި ފަހުން، އެ ނިޝާނާއެކު ނެރޭ ފުރަތަމަ ދިވެހި ރުފިޔާގެ ނޫޓުކަން ފާހަގަކޮށްލެވެއެވެ. މި އާ ނޫޓުތަކާއެކު ކުރީގެ ނޫޓުތައް ވެސް ދައުރުވަމުންދާނެ ކަމަށް އެމްއެމްއޭއިން ވިދާޅުވެފައިވެއެވެ.

އެމްއެމްއޭއިން އިތުރަށް ހާމަކޮށްފައިވާ ގޮތުގައި ރުފިޔާގެ ނިޝާން ތަޢާރަފުކުރެވުނީ 2022 ޖުލައި 16 ގައެވެ. މިހާރު ބޭނުންކުރަމުންދާ "ރަންދިހަ ފަހެއް" ޕޮލިމާ ނޫޓު ސީރީޒް ތަޢާރަފުކުރެވުނީ 2016 ގައެވެ. އޭރު ތަޢާރަފުކުރެވުނު ނޫޓު ސީރީޒްގައި ސޮއިކުރައްވާފައިވަނީ އޭރުގެ ގަވަރުނަރު މަރިޔަމް އަމީޒާއެވެ.

އެ ސީރީޒްގައި ހިމެނެނީ 5، 10، 20، 50، 100، 500 އަދި 1،000 ރުފިޔާގެ ނޫޓުތަކެވެ. އެއިން ކޮންމެ ނޫޓަކުން ވެސް ރާއްޖޭގެ ގުދުރަތީ ރީތިކަމާއި ކަނޑުފަޅުގެ މުއްސަނދިކަމާއި ތާރީޚާއި ސަގާފަތް ފެނެ އެވެ.

ކުރީގެ ގަވަރުނަރު އަލީ ހާޝިމް ސޮއިކުރައްވާފައިވާ މި ނޫޓުތަކުގައި ތާރީޚެއްގެ ގޮތުގައި ޖަހާފައި ވަނީ ޖުލައި 7، 2024 އެވެ.