ފަތުރުވެރިކަމުގައި ރާއްޖެއާ ވާދަވެރިކަން އޮންނަ ސްރީލަންކާއިން މި އަަހަރު ތިން މިލިއަން ޓޫރިސްޓުން ގެނައުމަށް އަމާޒު ހިފައިފިއެވެ. 

މިދިޔަ އަހަރު ރާއްޖެ އަދި ލަންކާއިން ވެސް އަމާޒު ކަނޑައެޅީ ދެ މިލިއަން ޓޫރިސްޓުން ހަމަކުރުމަށެވެ. އަހަރު ނިމުނުއިރު ރާއްޖެއަށް 2،046،615 ފަތުރުވެރިން ޒިޔާރަތްކުރިއިރު، ލަންކާއަށް 2,053,465 ފަތުރުވެރިން ޒިޔާރަތްކޮށްފައިވެއެވެ. މިދިޔަ އަހަރު ލަންކާއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ އިންޑިއާއިންނެވެ. އެ ޤައުމުގެ ހަތަރު ލައްކައަށްވުރެ ގިނަ ފަތުރުވެރިން މިިދިޔަ އަހަރު ލަންކާގައި ޗުއްޓީ ހޭދަކޮށްފައިވެއެވެ. ރާއްޖެއިން މިދިޔަ އަހަރު ލަންކާ އަށް ޒިޔާރަތްކޮށްފައި ވަނީ 47،222 ފަތުރުވެރިންނެވެ.

ދެހާސް ބާވީސް ވަނަ އަހަރު ސްރީ ލަންކާ ވެއްޓުނު މާލީ ވަޅުގަނޑުން އަރައިގަތުމަށް، ތިން މިލިއަން ފަތުރުވެރިންގެ އަމާޒު ކަނޑައަޅާފައިވަނީ މި އަަހަރު ފަތުރުވެރިކަމުން ފަސް ބިލިއަން ޑޮލަރުގެ އާމްދަނީއެއް ހޯދުމަށެވެ. މިއަހަރުގެ ޖެނުއަރީން ނޮވެމަބަރު މަހުގެ ނިޔަލަށް ފަތުރުވެރިކަމުން އާމްދަނީގެ ގޮތުގައި 2.8 ބިލިއަން ޑޮލަރު ލަންކާއަށް ލިބިފައިވެއެެވެ. 

ރާއްޖެއިން މި އަހަރަށް 2.2 މިލިއަން ފަތުރުވެރިން ގެނައުމަށް އަމާޒު ހިފާފައިވާއިރު، ފަތުރުވެރިކަމުން 5 ބިލިއަން ޑޮލަރުގެ އާމްދަނީއެއް މި އަަހަރު ހޯދުމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ވަނީ ކަނޑައަޅާފައެވެ. 

ރާއްޖެ އާއި ލަންކާގައި އޮތީ ތަފާތު ދެ ބާވަތެއްގެ ފަތުރުވެރިކަމެކެވެ. 

ފަތުރުވެރިކަން ވަރުދަގަކުރުމަށް ލަންކާއިން ވަނީ ފަތުރުވެރިކަމާ ބެހޭ ޤައުމީ ކޮމިޝަނެއް އުފައްދައިފައެވެ. އަދި ފަތުރުވެރިކަމުގެ ސިޔާސަތުތައް ކަނޑައެޅުމަށް ކައުންސިލެއް އުފެއްދުމަށް ވެސް ވަނީ ނިންމައިފައެެވެ.