ރާއްޖެ- ޗައިނާ މިނިވަން ވިޔަފާރީގެ އެއްބަސްވުމުގެ ދަށުން ޗައިނާއިން ބޭރުކުރާ ފުރަތަމަ ޝިޕްމަންޓަށް ކަންޓްރީ އޮފް އޮރިޖިން ސެޓްފިކެޓް ދޫކޮށްފިއެވެ. 

ބަސްޓައިލް ޕޯސްޓް ގްލޯބަލްގައި މިއަދު ޝާއިއުކުރި ޚަބަރެއްގައި ބުނެފައިވާ ގޮތުގައި ޖެނުއަރީ ފުރަތަމަ ދުވަހު އަމަލުކުރަން ފެށި ރާއްޖެ- ޗައިނާ މިނިވަން ވިޔަފާރީގެ އެއްބަސްވުމުގެ ދަށުން ޗައިނާގެ ފުރަތަމަ ޝިޕްމަންޓުގެ ގޮތުގައި ރާއްޖެއަށް ބޭރުކުރަނީ 31،400 ޑޮލަރު ( 484,188 ރުފިޔާ)ގެ ވަލެވެ. މި ޝިޕްމަންޓަކީ ޗައިނާގެ ގުއަންޒީން ރާއްޖެ ގެނަން ޝިޕްމަންޓެކެވެ. މިނިވަން ވިޔަފާރީގެ އެއްބަސްވުމުގެ ދަށުން ޑިއުޓީގެ އިނާޔަތް ހޯދުމަށް، މުދާ އުފެއްދި ޤައުމު އަންގައިދޭ ސެޓްފިކެޓް ހުށަހަޅަންޖެހެއެވެ.

ރާއްޖެއަށް މި ޝިޕްމަންޓް ފޮނުވާ ކުންފުނީގެ ސޭލްސް މެނޭޖަރު މާ ޒޫކިން ވިދާޅުވީ ގޮތުގައި ރާއްޖެއަކީ އެމީހުންނަށް އާ މާކެޓެކެވެ. އެމީހުންގެ އަތުން ވައު ގަންނަ ދިވެހި ވިޔަފާރިވެރިން ކުރިން 15 ޕަސެންޓް ޑިއުޓީއެއް ދައްކަން ޖެހޭ ކަމަށް އޭނާ ވިދާޅުވެފައިވެއެވެ. ޒޫކިން ވިދާޅުވި ގޮތުގައި ގިނަ ބާވަތްތަކުން ރާއްޖެއިން ސުން ޕަސެންޓުގައި ޑިއުޓީ ނެގުމަކީ އެމީހުންގެ ވިޔަފާރި ރާއްޖެއަށް ފުޅާކުރުމަށް ލިބުނު ފުރުސަތެކެވެ.

ޗައިނާގެ ކަމާބެހޭ ފަރާތްތަކުން އަންނަނީ ރާއްޖެ-ޗައިނާ މިނިވަން ވިޔަފާރީގެ އެއްބަސްވުމުގެ މައުލޫމާތު ފޯރުކޮށްދީ ރާއްޖެއަށް ބޭރުކުރާ މުދަލަށް ކަންޓްރީ އޮފް އޮރިޖިން ސެޓްފިކެޓް ދޫކުރުން ފަސޭހަ ކުރުމަށް މަސައްކަތް ކުރަމުންނެވެ. ޔޮންގޒޫ ކަސްޓަމްސްގެ ޑެޕިޔުޓީ ހެޑް ހުއި ހޯ ވިދާޅުވި ގޮތުގައި މުދާ ބޭރުކުރާ ފަރާތްތަކަށް އޮރިޖިން ސެޓްފިކެޓް އޮންލައިންކޮށް ވެސް ހޯދޭނެއެވެ.

މިދިޔަ އަހަރު ޗައިނާއިން ރާއްޖެއަށް 409.9 މިލިއަން ޑޮލަރުގެ މުދާ އެތެރެކޮށްފައިވެއެވެ. އެއީ 2023 ވަނަ އަހަރު އެ ޤައުމުން ރާއްޖެ އެތެރެކުރި 354.7 މިލިއަން ޑޮލަރަށްވުރެ 15.5 އިންސައްތަ އިތުރު ޢަދަދެކެވެ.