މި މަހުގެ 12 ވަނަ ދުވަހުގެ ނިޔަލަށް ދުވާލަކު އެވެރެޖުކޮށް 6،323 ފަތުރުވެރިން ރާއްޖެއަށް އައިސްފައިވާއިރު، ފާއިތުވި އަހަރާ އަޅާބަލާއިރު 10.2 އިންސައްތަ އިތުރަށް ފަތުރުވެރިން އައިސްފައިވާކަން ތަފާސްހިސާބުތަކުން ދައްކައިފިއެވެ. 

ފަތުރުވެރިކަމާ ބެހޭ ވުޒާރާއިން ޝާއިއުކުރައްވާފައިވާ ތަފާސްހިސާބުތައް ދައްކާ ގޮތުން މި އަހަރުގެ ފުރަތަމަ 12 ދުވަހު ރާއްޖެއަށް 69،553 ފަތުރުވެރިން އައިސްފައިވެއެވެ. ނިމުނު އަހަރުގެ އެ މުއްދަތުގައި ރާއްޖެއަށް ޒިޔާރަތްކުރީ 63،141 ފަތުރުވެރިންނެވެ. އޭގެ ކުރީ އަހަރުގެ ފުރަތަމަ 12 ދުވަހު ރާއްޖެއަށް ޒިޔާރަތްކުރީ 59،077 ފަތުރުވެރިންނެވެ. 

އެހެންކަމުން މި އަހަރުގެ ފުރަތަމަ 12 ދުވަހު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ނިމުނު އަހަރުގެ އެ މުއްދަތާ އަޅާބަލާއިރު 10.2 އިންސައްތަ އިތުރުވެފައިވާ ކަމަށް ތަފާސްހިސާބުތަކުން ދައްކައެވެ. 

މި މުއްދަތުގައި ރާއްޖެއަށް އެންމެ ގިނަ ޓޫރިސްޓުން އައީ، ރަޝިޔާއިންނެވެ. ރަޝިޔާއަކީ 2024 ވަނަ އަހަރު ދެވަނައަށް އެންމެ ގިނަ ޓޫރިސްޓުން ރާއްޖެ ޒިޔާރަތްކުރި ޤައުމެވެ. 

މި މަހުގެ އެކަކުން 12 އަށް ރަޝިޔާއިން ޖުމްލަ 11،367 ފަތުރުވެރިން އައިސްފައިވާއިރު އެއީ އެ މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންގެ 16.3 އިންސައްތައެވެ. 

ރަޝިޔާ ފިޔަވައި އެންމެ ގިނަ ފަތުރުވެރިން ރާއްޖެއަށް އައިސްފައިވަނީ އިޓަލީވިލާތުންނެވެ. އެ ޤައުމުން 8،499 ފަތުރުވެރިން އައިސްފައިވާއިރު، އެއީ ރާއްޖެއަށް އައި ފަތުރުވެރިންގެ 12.2 އިންސައްތައެވެ. 

ރާއްޖެއަށް ޒިޔާރަތްކުރި 69،553 ފަތުރުވެރިންގެ ތެރެއިން 48،176 ފަތުރުވެރިން ނުވަތަ 69.3 އިންސައްތަ މީހުން ޗުއްޓީ ހޭދަކުރީ ރިސޯޓުތަކުގައެވެ. ގެސްޓުހައުސްތަކުގައި ޗުއްޓީ ހޭދަކުރީ ރާއްޖެއަށް އައި ފަތުރުވެރިންގެ 25.5 އިންސައްތަ ނުވަތަ 17،711 މީހުންނެވެ. 

ފާއިތުވި އަހަރު ދެ މިލިއަނަށްވުރެ ގިނަ ފަތުރުވެރިން ރާއްޖެ އައިސްފައިވާއިރު މި އަހަރު، ސަރުކާރުގެ އަމާޒަކީ އެއަށްވުރެ 15 އިތުރަށް ފަތުރުވެރިން ގެނައުމެވެ. އެކަމަށްޓަކައި މުޅި އަހަރު ތެރޭގައި، މާކެޓިން ދާއިރާއިން ޚާއްޞަ މަސައްކަތްތަކެއް ކުރުމަށް ފަތުރުވެރިކަން އިޝްތިހާރުކުރާ ސަރުކާރު ކުންފުނި، އެމްއެމްޕީއާރުސީން ވަނީ ނިންމަވައިފައެވެ.