މިދިޔަ 2023 ވަނަ އަހަރުގެ ނިޔަލަށް 15.7 ބިލިއަން ރުފިޔާގެ ގެރެންޓީ ސަރުކާރުން ދޫކޮށްފައިވާ ކަމަށް އޮޑިޓަ ޖެނެރަލްގެ އޮފީހުން ވިދާޅުވެއްޖެއެވެ.

އޮޑިޓަ ޖެނެރަލް އޮފީހުން މިދިޔަ މަހުގެ 26 ވަނަ ދުވަހު އާންމު ކުރައްވާފައިވާ، 2023 ގެ ނިޔަލަށް ސަރުކާރުން ދޫކޮށްފައިވާ ގެރެންޓީތަކުގެ ބަޔާނުގައި ވިދާޅުވެފައިވާ ގޮތުގައި މިދިޔަ 2023 ވަނަ އަހަރުގެ ނިޔަލަށް ދޫކޮށްފައިވާ ގެރެންޓީތަކުގެ ތެރެއިން 972.8 މިލިއަން ރުފިޔާގެ ގެރެންޓީ އަކީ ރާއްޖޭގެ ބޭންކުތަކުން ނަގާފައިވާ ފައިސާ އަށް ދޫކޮށްފައިބާ ގެރެންޓީއެކެވެ. ހަސަތޭކަ މިލިއަން ރުފިޔާގެ ގެރެންޓީ ފިޔަވާ ދެން މުޅިން ވެސް ހިމެނެނީ އެމެރިކާ ޑޮލަރުން ދޫކޮށްފައިވާ ގެރެންޓީއެވެ.

އޮޑިޓް އޮފީހުގެ ބަޔާނުގައިވާ ގޮތުން ބޭރުގެ ބޭންކުތަނުން ނަގާފައިވާ ފައިސާ އަށް 960.9 މިލިއަން ޑޮލަރުގެ ގެރެންޓީ ދީފައިވެއެވެ. އޭގެތެރޭގައި ބޭންކުތަކުން ނަގާފައިވާ ފައިސާއަށް 24 މިލިއަން ޑޮލަރުގެ ގެރެންޓީ ދޫކޮށްފައިވެއެވެ.

ސަރުކާރުން މައިގަނޑު ގޮތެއްގައި ގެރެންޓީދޫކޮށްފައި ވަނީ އެކި މަޝްރޫއުތައް ހިންގުމަށް ސަރުކާރު ހިއްސަވާ ކުންފުނިތަކުން ނަގާފައިވާ ލޯނަށެވެ. މިގޮތުން އެންމެ ބޮޑު ގެރެންޓީއެއް ދޫކޮށްފައިވަނީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށެވެ. އެއީ 7،000 ހައުސިންގ ޔުނިޓް ތަރައްގީ ކުރުމަށް 280 މިލިއަން ޑޮލަރުގެ ގެރެންޓީއަކާއި 1،530 ހައުސިންގ ޔުނިޓް ތަރައްޤީކުރުމަށް 104.8 މިލިއަން ޑޮލަރުގެ ގެރެންޓީއެކެވެ.