މާލެއާއި ހުޅުލެ އަދި ހުޅުމާލެ ގުޅުވައިދޭ ޗައިނާ ރާއްޖެ އެކުވެރިކަމުގެ ބުރިޖަކީ ދިވެހިރާއްޖެއާއި ޗައިނާގެ މެދުގައި އޮތް ގާތް ގުޅުމުގެ ރަމްޒެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މީގެ ހަތް އަހަރު ކުރިން 2018 ވަނަ އަހަރުގެ އޯގަސްޓު މަހުގައި ހުޅުވި ހުޅުމާލޭ ބުރިޖު ބޭނުންކުރަން ފެށިތާ ހަތް އަހަރު ފުރުމުގެ މުނާސަބަތުގައި އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ އެ ބުރިޖުގެ ސަަބަބުން ރާއްޖެއަށް އައު ދޮރުތަކެއް ހުޅުވިގެން ދިޔަ ކަމަށެވެ. 

އަދި އެ ބުރިޖަކީ ހަގީގީ އެކުވެރިކަމާއި ގުޅުމުން ހާސިލުވާނެ ފައިދާއަކީ ކޮބައިކަމުގެ މައްޗަށް ދަލީލުކުރާ ފަހުރުވެރި ހެއްކެއް ކަމުގައިވެސް ރައީސް ވިދާޅުވިއެވެ. އެމަނިކުފާނު އިތުރަށް ވިދާޅުވީ އެ ބުރިޖަކީ ރާއްޖެއާއި ޗައިނާގެ މެދުގައި އޮތް ދެމިގެންދަނިވި ވިލުންތެރި ގުޅުމާއި އެއްބައިވަންތަކަމާއި އިތުބާރާއި، ހިއްސާވަނިވި ތަނަވަސްކަމުގެ މައްޗަށް ދަލީލުކުރާ ހެއްކެއް ކަމަށެވެ. 

ހުޅުމާލޭ ބުރިޖުގެ މަސައްކަތް ކުރެވުނުއިރު އުމްރާނީ ތަރައްގީގެ މަސައްކަތްތަކާ ހަވާލުވެވަޑައިގެން ހައުސިން މިނިސްޓަރުގެ މަގާމުގައި ހުންނެވީ ރައީސް ޑރ.މުއިއްޒެވެ. ބުރިޖުގެ މަސައްކަތް ސަރުކާރުގެ ފަރާތުން ވިލަރެސްކޮށް ބެލެހެއްޓީ އެ މިނިސްޓްރީންނެވެ. 

ބުރިޖުގެ އަމަލީ މަސައްކަތުގައި އެއިރުގެ ސަރުކާރުގެ ފަރާތުން އެންމެ ބޮޑު ޒިންމާއެއް އުފުއްލަވައި، އެ މަޝްރޫއު ކާމިޔާބުކަމާއެކު ކަނޑައެޅި މުހުލަތުގައި ނިންމައިލެވުމުގައި އެންމެ ބޮޑު ދައުރެއް އަދާކުރެއްވި ބޭފުޅަކީވެސް އެއިރު ހައުސިން މިނިސްޓަރު ކަމުގައި ހުންނެވި މިހާރުގެ ރައީސެވެ.