ވެއްޓަށް ކުރިމަތިވެފައިވާ ގޮންޖެހުންތަކާ ކުރިމަތިލުމުގައި ސަރަޙައްދީ އެއްބާރުލުން މުހިއްމުކަމަށް، ފަތުރުވެރިކަމާއި ތިމާވެއްޓާ ބެހޭ ވުޒާރާގެ ވަޒީރު އިބްރާހީމް ޠާރިޤު ވިދާޅުވެއްޖެއެވެ. 

ވަޒީރު ޠާރިޤު މިފަދައިން ވިދާޅުވީ ބައިނަލްއަޤްވާމީ އޭޝިއާ-ޕެސިފިކް ވެށި ފޯރަމްގައި ވާހަކަދައްކަވަމުންނެވެ. ފޯރަމް ކުރިއަށްދިޔައީ އޮގަސްޓް 26 އިން 29 އަށް ފިޖީގައެވެ. 

ވަޒީރު ވަނީ ރާއްޖޭގެ ވެށީގެ ސަރަހައްދު ހަމައެކަނި ނާޒުކުކަމުގެ ސަރަހައްދަކަށް ނުވެ، ވެށީގެ ދާއިރާގައި އިސްނަގައި، އެއްބާރުލުމުގެ ރީތި ނަމޫނާއަކަށް ވުމަށް ގޮވާލައްވާފައެވެ.

ރާއްޖޭގެ ނާޒުކު ވެށީގެ މައްސަލައާ ގުޅޭގޮތުން ދެއްކެވި ވާހަކަފުޅުގައި ވަޒީރު ވަނީ ގޮންޖެހުންތާ ކުރިމަތިލުމުގައި ސަރަޙައްދީގޮތުން އެއްބައިވަންތަކަމާއި އެއްބާރުލުން އިތުރުކުރުމުގެ މުހިންމުކަން ފާހަގަކުރައްވާފައެވެ.

އެމަނިކުފާނު އިތުރަށް ވިދާޅުވީ، އޭޝިއާ-ޕެސިފިކް ސަރަހައްދަކީ މޫސުމީ ބަދަލުތަކުގެ ސަބަބުން ނާޒުކުކަން ބޮޑު ސަރަހައްދެއް ކަމުގައި ވީނަމަވެސް، ވެށީގެ ދާއިރާގައި ބަދަލުތައް ގެނެސް، އިސްނަގައި، އެހެން ޤައުމުތަކަށް ނަމޫނާ ދެއްކުމުގެ ޤާބިލުކަން އެބައޮތް ކަމަށެވެ. އެހެންކަމުން، ގުޅިގެން މަސައްކަތްކޮށް، ހައްލުތަކަށް މަގުފަހިކުރުމަށް ވަނީ ގޮވާލައްވާފައެވެ.

ވެށީގެ ދާއިރާގައި ރާއްޖެއިން އަދާކުރާ މުހިންމު ދައުރާއި، ދުނިޔޭގެ މައްސަލަތަކަށް ސަރަހައްދީ ގޮތުން ހައްލު ހޯދުމަށް އިސްކަންދިނުން މުހިއްމު ކަމަށް ވެސް ވަޒީރު ގޮވާލެއްވިއެވެ.