މި އަހަރުގެ ޖޫން މަހުގެ ނިޔަލަށް މަސް ކިރުވި މިންވަރާއި ރާއްޖެއިން މަސް ބޭރުކުރި މިންވަރުވެސް އިތުރުވެފައިވާކަން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތަކުން ދައްކައިފިއެވެ. 

މަރުކަޒީ ބޭންކުން އާއްމުކޮށްފައިވާ ތަފާސްހިސާބުތަކަށް ބަަލާއިރު ނިމުނު އަހަރުގެ ޖަނަވަރީން ޖޫން މަހުގެ ނިޔަލަށް ރާއްޖެއިން ބޭރުކުރީ 57.1 މިލިއަން ޑޮލަރުގެ މަހާއި މަހުގެ އުފެއްދުންތަކެވެ. މި އަހަރުގެ އެ މުއްދަތުގައި ބޭރުކުރި މަހާއި މަހުގެ އުފެއްދުންތަކުގެ އަގު 79.4 މިލިއަން ޑޮލަރަށް އަރައެވެ. އެއީ 39 އިންސައްތަައިގެ އިތުރުވުމެކެވެ. 

އެންމެ ބޮޑަށް އިތުރުވީ ގަނޑުކުރި މަހާއި ތާޒާ މަސް ބޭރުކުރި މިންވަރެވެ. އެގޮތުން ނިމުނު އަހަރުގެ ޖަނަވަރީން ޖޫން މަހުގެ ނިޔަލަށް ތާޒާ އަދި ގަނޑުކުރި މަސް ބޭރުކުރި މިންވަރަކީ 32 މިލިއަން ޑޮލަރެވެ. މި އަހަރު އެ އަދަދުވަނީ 43.3 އިންސައްތައިން އިތުރުވެ 55.1 މިލިއަން ޑޮލަރަށް އަރާފައެވެ. 

މަސް ކިރުވި މިންވަރަށް ބަލާއިރު މި އަހަރުގެ މިހާޔަނަށް 45،735 މެޓްރިކްޓަނުގެ މަސް ކިރުވާފައިވެއެވެ. ނިމުނު އަހަރު ކިރުވި 34،021 މެޓްރިކްޓަނާ އަޅާބަލާއިރު މިއީ 34.4 އިންސައްތައިގެ އިތުރުވުމެކެވެ. ތަފާސްހިސާބުތަކުން ފެންނަ ގޮތުގައި އެންމެ ބޮޑަށް އިތުރުވީ ކަޅުބިލަމަސް ކިރުވި މިންވަރެވެ. 

އެގޮތުން ފާއިތުވި އަހަރުގެ ޖަނަވަރީ ޖޫންގެ ނިޔަލަށް ކިރުވާފައިވަނީ 27،835 މެޓްރިކްޓަނުގެ ކަޅުބިލަމަހެވެ. ނަމަަވެސް މި އަހަރުގެ އެ މުއްދަތުގައި ކަޅުބިލަމަސް ކިރުވި މިންވަރު 43 އިންސައްތަ އިތުރުވެ ކިރުވި އަދަދުވަނީ 39،793.8 މެޓްރިކްޓަނަށް އިތުރުވެފައެވެ. 

މަސް ކިރުވި މިންވަރާއި މަހާއި މަހުގެ އުފެއްދުންތައް ރާއްޖެއިން އެކްސްޕޯޓުކުރި މިންވަރު އިތުރުވި މައިގަނޑު ސަބަބަކީ ނިމުނު އަހަރުގެ ޑިސެންބަރު ދިހަވަނަ ދުވަހުން ފެށިގެން މަސްވެރިން ބާނާ މަހަށް 48 ގަޑިއިރު ތެރޭ ފައިސާ ދޫކުރަން ފެށުމުގެ ސަބަބުންނެވެ.