ރާއްޖެއަށް ފަތުރުވެރިކަން ތައާރަފުކުރައްވައި، މިއަދު މިދެކޭ ޒަމާނީ އިގުތިސާދާއި ތަރައްގީއަށް މަގުފަހިކުރެއްވުމުގެ އެއް މޭސްތެރިޔަކީ ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު ޢުމަރު މަނިކެވެ. މިއަދު އޭނާ ދުނިޔެ ދޫކުރެއްވުމާއެކު، ސިޔާސީ ލީޑަރުންނާއި ވިޔަފާރިވެރިންނާއި، އާއްމުންގެ ގިނަ ބަޔަކު އަންނަނީ އޭނާގެ އަގުހުރި ގައުމީ ހިދުމަތުގެ އެކި ކަންކަން ފާހަގަކުރައްވައި ތާރީފުކުރުމާއެކު، އާއިލާއަށް ތައުޒިޔާ ދަންނަވަމުންނެވެ. 

އެގޮތުން އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު މީޑިޔާއަށް ފޮނުއްވި މެސެޖެއްގައި ފާހަގަކުރެއްވީ އެމްޔޫ މަނިކުގެ ގައުމީ ހިދުމަތްތަކުގެ ތެރޭގައި ގިނަ ބަޔަކަށް ފާހަގަވެފައި ނެތް ނުވަތަ ގިނަ ބައެއްގެ ސަމާލުކަން ދެވިފައި ނެތް ކަމެކެވެ. އެއީ މިސްކިތް ބިނާކުރެއްވުމަށް މަނިކު ދެއްވި ސަމާލުކަމެވެ. 

ޝަހީމު ފާހަގަކުރެއްވި ގޮތުން މަނިކަކީ އިޖުތިމާއީ ކަންކަމާއި، ތައުލީމއި މީހުން ބިނާކުރެއްވުމަށް ވަރަށް ބޮޑަށް އިސްކަަންދެއްވި ބޭފުޅެކެވެ. ރާއްޖޭގައި މީހުން ބިނާކުރުމުގެ މަސައްކަތް ވަރަށް ހަނި ދާއިރާއެއްގައި އޮތް ޒަމާނެއްގައި މަނިކުވަނީ މަތީ ތައުލީމު ހާސިލުކުރުމަށް ބޭނުންވި ވަރަށް ގިނަ ދިވެހިންނަށް އެހީތެރިކަން ދެއްވާފައެވެ. 

ޝަހީމު އިތުރަށް ވިދާޅުވީ މަނިކަކީ މިސްކިތްތައް ބިނާކުރުމާއި މަރާމާތުކުރުމުގެ މަސައްކަތުގައި ވަރަަށް ބޮޑު އެހީތެރިކަމެއް ވެދެއްވި ބޭފުޅެއް ކަމަށެވެ. އެގޮތުން އަވަހާރަވި އާލާސްކަންފުޅަަށް ފަރުވާކުރެއްވުމަށް ސިންގަޕޫރަށް ފުރާވަޑައިގަތުމުގެ ކުރިން، ހުޅުމާލޭ ސަރަހައްދުގައި ބޮޑު މިސްކިތެއް ބިނާކުރެއްވުމަށް ސިޓީއެއް މިނިސްޓްރީއަށް ފޮނުއްވިކަމަށް ޝަހީމު ވިދާޅުވިއެވެ. 

ޝަހީމު ވިދާޅުވި ގޮތުގައި އުމަރު މަނިކުގެ ހަޔާތްޕުޅުގެ ފަހު އުންމީދަކީވެސް އެ މިސްކިތް ބިނާކުރެއްވުމެވެ. ސިޓީއެއް ފޮނުއްވުމުގެ އިތުރަށް ބޭފުޅަކު ފޮނުއްވައި، މިސްކިތް ބިނާކުރެއްވުމަކީ ވަރަށް ބޮޑަށް ބޭނުންފުޅު ކަމެއްކަން މިނިސްޓްރީއާ ހިއްސާކުރެއްވި ކަމުގައިވެސް ޝަހީމު ވިދާޅުވިއެވެ. 

އަދި އުމަރު މަނިކުފެ ފަރާތްޕުޅުން ވަޑައިގެންނެވި ބޭފުޅާ މެދުވެރިކުރައްވައި މިސްކިތް އެޅުއްވުމަށް ބިމެއް ވީހާވެސް އަވަހަށް ހަމަޖައްސައިދިނުމަށް މިނިސްޓްރީގައި އެދިވަޑައިގެންނެވިކަން ފާހަގަކުރައްވަމު ޝަހީމު ވިދާޅުވީ މިސްކިތް އެޅުމަށް ބޭނުންވާ ޖާގަ ހަމަޖައްސަވާފައިވާ ކަމަަށެވެ. 

އުމަރު މަނިކު އަވަހާރަވުމާ ގުޅިގެން ރައީސް ޑރ.މުޙައްމަދު މުޢިއްޒުވެސް ތައުޒިޔާ ވިދާޅުވެ، އޭނާގެ އަގުހުރި ގައުމީ ހިދުމަތްތައް ފާހަގަކުރެއްވިއެވެ. ކުރީގެ ރައީސުންކަމަށްވާ ރައީސް މުޙައްމަދު ނަޝީދާއި، ރައީސް ޑރ.މުޙައްމަަދު ވަޙީދާއި ރައީސް އަބްދުﷲ ޔާމީނާއި ރައީސް އިބްރާހީމް މުހައްމަދު ސޯލިހުވެސް މަނިކުގެ އާއިލާއަށް ތައުޒިޔާ ވިދާޅުވިއެވެ.