ވޯލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ބާއްވާ ވީއޭއެމް ކަޕް ފިރިހެން ޑިވިޝަނުގެ ފައިނަލުގެ ފުރަތަމަ ޖާގަ ކްލަބް އެޗްޑީސީ އިން ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި މިއަދު ހަވީރު ކުޅުނު މެޗުގައި ދަޑިމަގު ސްޕޯޓްސް އެންޑް ރެކްރިއޭޝަން ކްލަބް އަތުން އެޗްޑީސީ މޮޅުވީ 3-1 ސެޓުންނެވެ.

މި މެޗުގެ ފުރަތަމަ ސެޓު ވާދަވެރި ކުޅުމަކަށްފަހު، 28-26 އިން އެންމެ ފަހުގެ ޗެމްޕިއަން، އެޗްޑީސީ ގެންގޮސްފައިވަނިކޮށް، ދަޑިމަގުން ވަނީ 25-21 އިން ދެވަނަ ސެޓު ކާމިޔާބުކޮށްފައެވެ.

އެއަށްފަހު ދެން ކުޅެވުނު ތިންވަނަ އަދި ހަތަރުވަނަ ސެޓުން އެޗްޑީސީ ކުރިހޯދީ 25-19 އަދި 25-22 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ އެޗްޑީސީގެ ބިދޭސީ ކުޅުންތެރިޔާ، ސެބާސްޓިއަން ގިރާލްޑޯ އެވެ.