އެއްވަނަ ޖޫނިއަރ ނޭޝަނަލް ކެރަމް ޗެމްޕިއަންޝިޕްގެ ނަމުގައި މުޅިން އަލަށް މުބާރާތެއް ބޭއްވުމަށް ކެރަމް އެސޯސިއޭޝަން އޮފް މޯލްޑިވްސް (ސީއޭއެމް) އިން ނިންމައި، ބައިވެރިވުމުގެ ފުރުޞަތު ހުޅުވާލައިފިއެވެ.

މިއީ ޤައުމީ ކެރަމް މުބާރާތުގައި ޖޫނިއާ ކުޅުންތެރިންނަށް ހާއްސަކޮށް އިވެންޓެއް ހިމެނި ފުރަތަމަ ފަހަރެވެ.

ހުޅުމާލޭގައި ހުންނަ ސްޕޯޓްސް ކޮމްޕްލެކްސްގެ ކެރަމް އެރީނާގައި ބާއްވާ މުބާރާތް ފަށާނީ މި ޖޫން މަހުގެ 26 ގަ އެވެ.

ސީއޭއެމް އިން ބުނީ، މުބާރާތުގައި ބައިވެރިވެވޭނީ ދެ އުމުރުފުރާއަކަށް ކަމަށެވެ. އެއީ، އުމުރުން 15 އަހަރުން ދަށް އަދި 19 އަހަރުން ދަށުގެ ކުޅުންތެރިންނަށް ކަމަށެވެ.

ނޮކްއައުޓް އުސޫލުން ކުރިއަށް ގެންދިއުމަށް ނިންމާފައިވާ މުބާރާތުގައި ހިމެނެނީ؛ އަންހެން އަދި ފިރިހެން ސިންގަލްސް އާއި ޑަބަލްސް އިވެންޓެވެ.

މި މުބާރާތުގައި ބައިވެރިވުމުގެ ސުންގަޑިއަކީ 22 ޖޫން 2025 ވާ އާދީއްތަ ދުވަހުގެރޭ 10:00 ކަމަށް ވެސް ސީއޭއެމް އިން ވަނީ ބުނެފައެވެ.