ENGLISH
30 އޯގަސްޓު 2025
ޓްރަމްޕް ވިދާޅުވީ މައުދަނުތަކާއި ދަރިވަރުންނާ ގުޅޭ އެއްބަސްވުމަކަށް ޗައިނާއާ އެކު އާދެވިފައިވާކަމަށް
12 ޖޫން 2025
|
ދުނިޔޭގެ އެންމެ ބޮޑު ދެ އިޤުތިޞާދު ކަމަށްވާ، އެމެރިކާ އާއި ޗައިނާއާ ދެމެދު އުފެދިފައިވާ ވިޔަފާރީގެ ހަނގުރާމަ ފިނިކުރަން، ދެ ޤައުމުގެ ދެމެދުގައި ކުރެވުނު މަޝްވަރާތަކުން "އެއްބަސްވުމަކާ" ހަމައަށް އާދެވިފައިވާކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް ވިދާޅުވީ، އެ އެއްބަސްވުމުގެ ދަށުން، އެމެރިކާގެ ކުންފުނިތަކަށް ދަގަތްފާނާއި މައުދަނުތައް ޗައިނާއިން ސަޕްލައިކުރަން އެއްބަސްވެފައިވާ ކަމަށެވެ. އޭގެ ބަދަލުގައި، އެމެރިކާގައި ކިޔަވާ ޗައިނާގެ ދަރިވަރުންނަށް ވިސާ ދިނުން މަޑުޖައްސާލަން ނިންމި ނިންމުން އަނބުރާ ގެންދެވޭނެ ކަމަށް ޓްރަމްޕް ވިދާޅުވިއެވެ.
އެ މަނިކުފާނާއި ޗައިނާގެ ރައީސް ޝީ ޖިންޕިންގެ ރުހުން ލިބުމާއެކު، އެ އެއްބަސްވުމަށް އަމަލުކުރަން ފަށާނެ ކަމަށް ވެސް ޓްރަމްޕް ހާމަކުރެއްވިއެވެ.
މިދިޔަ ޖެނުއަރީ މަހު އެމެރިކާގެ ރައީސްކަމުގެ ދެވަނަ ދައުރަކަށް ޓްރަމްޕް ވަޑައިގެންނެވި ފަހުން، އެކި ފަހަރުމަތިން ޑިޔުޓީ ބޮޑުކުރަމުން އައިސް، ޗައިނާއިން އެތެރެކުރާ މުދަލުން ނަގާ ޑިޔުޓީ 145 ޕަސެންޓުން މައްޗަށް ޖެއްސިއެވެ. އޭގެ ރައްދުގައި ޗައިނާއިން ވަނީ އެމެރިކާއިން އެތެރެކުރާ މުދަލުން 125 ޕަސެންޓުން ޑިޔުޓީ ބޮޑުކޮށްފައެވެ.
ނަމަވެސް، ވިޔަފާރީގެ ހަނގުރާމައެއް ނުފަށައި، މަޝްވަރާއަށް ޖާގަދިނުމަށް، ދެ ޤައުމުން ވެސް ވަނީ ބޮޑުކުރި ޑިޔުޓީއަށް ޢަމަލުކުރުން މިދިޔަ މެއި މަހުގެ ތެރޭގައި މަޑުޖައްސައިލަން ނިންމައިފައެވެ.
އެއްބަސްވުމަކަށް އާދެވިފައިވާކަމަށް ޓްރަމްޕް އިޢުލާނުކުރެއްވީ، ދެ ޤައުމުގެ އިސް އޮފިޝަލުންގެ މެދުގައި އިނގިރޭސިވިލާތުގެ ލަންޑަންގައި ދެ ދުވަހަށް ދިގުދެމިގެންދިޔަ ފުޅާ މަޝްވަރާތަކަށް ފަހުއެވެ.
ނަމަވެސް، އެއްބަސްވެވުނު ކަންކަމާ ގުޅޭ މާބޮޑު ތަފްޞީލެއް އަދި ހާމަކޮށްފައިނުވާތީ، ހަޤީޤަތުގައި ވެސް ޗައިނާ އާއެކު އެއްބަސްވުމަކަށް އާދެވިފައިވާކަމާމެދު ބައެއް ފަރާތްތަކުން ދަނީ ސުވާލު އުފައްދަމުންނެވެ.
ލަންޑަންގައި މަޝްވަރާތައް ފެށީ، ޝީ އާއި ޓްރަމްޕް ފޯނުން މަޝްވަރާ ކުރެއްވުމަށް ފަހުއެވެ.