އިންޓަރނޭޝަނަލް ކްރިމިނަލް ކޯޓު (އައިސީސީ)ގެ ހަތަރު ފަނޑިޔާރަކާ ދެކޮޅަށް، އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ފިޔަވަޅު އަޅައިފިއެވެ.

އެމެރިކާއާ ދެކޮޅަށް އެއްވެސް އަސާސެއް ނެތި ޢަމަލުކުރަމުންދާ ކަމަށް ތުހުމަތުކޮށް، އެ ހަތަރު ފަނޑިޔާރުންނާ ދެކޮޅަށް ފިޔަވަޅު އަޅާފައިވާކަމަށް، އެމެރިކާގެ ޚާރިޖީ ވަޒީރު މާކޯ ރޫބިޔޯ ނެރުއްވި ބަޔާނެއްގައި ވިދާޅުވިއެވެ.

މި ފިޔަވަޅު އަޅަން މަޖުބޫރުވީ، އައިސީސީގެ ފަނޑިޔާރުކަމުގެ ބާރުތައް ނަހަމަގޮތުގައި ބޭނުންކޮށް، އެމެރިކާ އާއި އެކުވެރި އިޒްރޭލުގެ ޤައުމީ ސަލާމަތާއި ރައްކާތެރިކަމަށް ހުރަސްއެޅޭ ގޮތަށް ޢަމަލުކުރަމުންދާތީ ކަމަށް އެ ބަޔާނުގައި ރޫބިޔޯ ވިދާޅުވިއެވެ.

މި ފިޔަވަޅުތަކުގެ ސަބަބުން، އެމެރިކާގައި ހުރި މި ހަތަރު ފަނޑިޔާރުންގެ ގެދޮރާއި މުދަލާއި ފައިސާ ހިފެހެއްޓޭނެއެވެ. އަދި އެމެރިކާގައި ހަރަކާތްތެރިވާ ކުންފުނިތަކާއި އަމިއްލަ ފަރާތްތަކުން ވެސް މި ފަނޑިޔާރުންނާ އެކު އެއްވެސް މާލީ އަދި ޚިދުމަތް ދިނުމުގެ އެއްވެސް މުޢާމަލާތެއް ކުރުން ވެސް ވަނީ މަނާކޮށްފައެވެ.

އެމެރިކާގެ އެ ނިންމުން ކުށްވެރިކޮށް، އައިސީސީން ނެރުނު ބަޔާނެއްގައި ވަނީ، އެމެރިކާގެ މި ފިޔަވަޅުތަކަކީ އެ ކޯޓުގެ މިނިވަންކަމަށް ހުރަސްއަޅަން ކުރި ކަމެއްގެ ގޮތުގައި ސިފަކޮށްފައެވެ.

އަފްޣާނިސްތާނުގައި އެމެރިކާއިން ކުރި ހަނގުރާމައިގެ ތެރެއިން ހިންގި ކަމަށް ތުހުމަތުކުރެވޭ ޖަރީމާތައް ތަހުޤީޤުކުރަން އުޅުމާއި، ފަލަސްތީނުގެ ޣައްޒާގައި އިޒްރޭލުން ހިންގަމުންދާ ނަސްލުހޭދަކުރުމުގެ ޖަރީމާތަކާ ދެކޮޅަށް އައިސީސީން ތެދުވުމަކީ، އެ ކޯޓާ މެދު އެމެރިކާގެ ހިތްހަމަނުޖެހުން ބޮޑުވެފައިވާ މައްސަލަތަކެވެ.