ޖަރުމަނުގެ އިތުބާރު ޑިފެންޑަރު ނިކޯ ޝްލޮޓަބެކުގެ ފައިގެ ކުޑަހުޅަށް ލިބުނު އަނިޔާއަކާ ގުޅިގެން، މިހާރު ކުރިއަށްދާ ފީފާ ވޯލްޑް ކަޕް 2026 ގައި އޭނާއަށް ދެން ނުކުޅެވޭނެކަން ކަށަވަރުވެއްޖެއެވެ.

އުމުރުން 26 އަހަރުގެ ޑިފެންޑަރަށް މި އަނިޔާ ކުރިމަތިވީ، ހޮނިހިރު ދުވަހު އައިވަރީ ކޯސްޓާ ދެކޮޅަށް ކުޅެ 2-1 ގެ ނަތީޖާއަކުން ޖަރުމަނު މޮޅުވި މެޗުގެ ތެރެއިންނެވެ. އެ މެޗުގެ ފުރަތަމަ ހާފަށްފަހު އޭނާގެ ބަދަލުގައި ކުޅެން އެރީ އެންޓޯނިއޯ ރުޑިގާއެވެ.

ޖަރުމަން ޓީމުން ނެރުނު ބަޔާނެއްގައި ބުނެފައިވަނީ، ޝްލޮޓަބެކުގެ ވާތު ފައިގެ ކުޑަހުޅަށް ބޮޑު އަނިޔާއެއް ލިބިފައިވާ ކަމަށާއި، އޭނާ ކުޅުމާ ދުރުގައި މަދުވެގެން މަސްތަކެއް ވަންދެން ހުންނަން ޖެހޭނެ ކަމަށެވެ. އެކަމަކު ބޮރޫޝިއާ ޑޯޓްމުންޑަށް ކުޅޭ މި ކުޅުންތެރިޔާ މިވަގުތު އެމެރިކާގައި މަޑުކުރާނީ ޓީމާ އެކުގައި ކަމަށްވެސް އެ ބަޔާނުގައިވެއެވެ.

ގްރޫޕް އީގެ އެއްވަނަ ޓީމުގެ ގޮތުގައި ދެވަނަ ބުރަށް ޖަރުމަން މިހާރުވެސް ދަތުރުކޮށްފައިވާއިރު، އަންނަ ބުރާސްފަތި ދުވަހު އެ ޓީމު ނުކުންނާނީ އެކުއަޑޯއާ ދެކޮޅަށެވެ. މުބާރާތް ފެށިފައިވާތީ، އަނިޔާވި ޝްލޮޓަބެކުގެ ބަދަލުގައި އައު ކުޅުންތެރިއަކު ޓީމަށް އިތުރުކުރުމުގެ ފުރުސަތެއް ޖަރުމަނަކަށް ނެތެވެ.

ވޯލްޑް ކަޕުގައި ކިއުރަސޯއާ ދެކޮޅަށް ކުޅެ 7-1 ގެ ނަތީޖާއަކުން ޖަރުމަން މޮޅުވި ފުރަތަމަ މެޗުގައި ޝްލޮޓަބެކް ވަނީ މުޅި މެޗުގައި ކުޅެ، ލަނޑެއްވެސް ކާމިޔާބުކޮށްފައެވެ.

ޖަރުމަނުގެ ކޯޗު ހޫލިއަން ނާގަލްސްމަން ބުނި ގޮތުގައި، ޝްލޮޓަބެކް ފަދަ ހުނަރުވެރި ޑިފެންޑަރެއް ނެތުމަކީ ދަނޑުމަތީގައި ޓީމަށް ދިމާވާނެ ބޮޑު އުނިކަމެކެވެ. "މިއީ އޭނާގެ ވޯލްޑް ކަޕަށްވުމުގެ ފުރުސަތު އޮތް މުބާރާތެއް. އިއްޔެ އަހަރެމެން އެންމެން މަސައްކަތް ކުރީ އޭނާއަށް ހިތްވަރު ދޭން. އޭނާއަކީ އަބަދުވެސް އުންމީދާއެކު ކުރިއަށް ބަލާ ކުޅުންތެރިއެއް،" ކޯޗު ބުންޏެވެ. އަދި އޭނާ ޓީމާއެކު މަޑުކުރުމަކީ ދަނޑުން ބޭރުގައިވެސް ކުޅުންތެރިންގެ ރޫހު ވަރުގަދަ ކުރުމަށް ލިބޭނެ ބޮޑު ހިތްވަރެއް ކަމަށް ނާގަލްސްމަން ފާހަގަކުރިއެވެ.

ޝްލޮޓަބެކް ނެތްތަން ފޫބެއްދުމަށް ޖަރުމަން ޓީމުގައި މިހާރު ތިބި ޑިފެންޑަރުންނަކީ ޖޮނަތަން ޓާ، ރުޑިގާ، ވަލްޑެމާ އެންޓަން އަދި ނިއުކާސަލްގެ މަލިކް ތިއޯއެވެ.

ކުރިން އެހެން ކުލަބަކަށް ބަދަލުވެދާނެ ކަމަށް އަޑުފެތުރުނު ނަމަވެސް، ޝްލޮޓަބެކް ވަނީ މި އަހަރުގެ އޭޕްރީލް މަހު ޑޯޓްމުންޑާއެކު ހަދާފައިވާ އެއްބަސްވުން 2031 ވަނަ އަހަރުގެ ނިޔަލަށް އައުކޮށްފައެވެ.