ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއް ދުވަހެއްގައި ބޭއްވުމަށް ނުފެންނަކަމަށް ބުނެ އިދިކޮޅު ސިޔާސީ ބޭފުޅުން ދައްކަމުން އަންނަ ވާހަކަތަކަށް ގަބޫލުކުރެވޭނެ ފަދަ ހެއްކެއް އަދިވެސް ދައްކާފައި ނުވާތީ އޭނާއާއެކު އެމްޑީޕީގެ ބޭފުޅުން އާއްމު ބަހުސަކަށް ވަޑައިގަތުމަށް ވެރިކަންކުރާ ޕީޕަލްސް ނޭޝަނަލް ކޮންގްރެސް ޕާޓީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ފަލާހު ދައުވަތު އަރުވައިފި އެވެ. 

ފަލާހު މި ދައުވަތު އެރުވީ ޕީއެންސީގެ ފަރާތުން ކުރިއަށްގެންދިޔަ ހުޅުމާލެ ދެކުނު ޖަގަހަ ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ.

ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބާއްވައިިގެން ލިބޭނެ ގެއްލުމެއް ވާދަވެރި އެއްވެސް ބޭފުޅަކަށް ވިދާޅުވެ ނުދެއްވުނުކަމަށާއި އެބޭފުޅުންގެ މަސައްކަތަކީ ހަގީގަތާއި ހިލާފު ވާހަކަތައް ރައްޔިތުންގެ މެދުގައި ފެތުރުންކަމަށް ފަލާހު ވިދާޅުވި އެވެ. 

ފަލާހު ވިދާޅުވީ ދެ އިންތިހާބު އެއް ދުވަހެއްގައި ބޭއްވުމުގެ ސަބަބުން ގައުމުގެ ހަމަޖެހުން ގާއިމުވެ، އިގްތިސާދީ އަދި އިޖުތިމާއީ އެތައް ކުރިއެރުމެއް ލިބިގެންދާނޭ ކަމަށެވެ. 

ވާދަވެރިންނަށް ސަޕޯޓު އޮތް ނަމަ އޭޕްރީލް މަހުގެ ހަތަރު ވަނަ ދުވަހު ބާއްވާ އިންތިހާބުގައި ރައްޔިތުން ނިންމާނެ ނިމުމަކާ މެދު ބިރުން އުޅެނީ ކީއްވެގެންތޯ ސުވާލު އުފައްދަވައި ފަލާހު ވަނީ ރައްޔިތުންނަށް ހިދުމަތް ދިނުމުގެ ވިސްނުން ހުރީ ކޮންގްރެސް ޕާޓީގެ ކަމަށްވާތީ ކުރިއަށް އޮތް އިންތިހާބުގެ މެޖޯރިޓީ އެ ޕާޓީއަށް ދިނުމަށް އިލްތިމާސްކުރައްވާފަ އެވެ.