ރައީސަކީ ސިޔާސީ ފައިދާއަށް ބެއްލެވުމެއްނެތި ހަރުދަނާ، މުހިންމު ނިންމެވުންތަކެއް ނިންމަވާ ބޭފުޅެއް ކަމަށް ކޮންގްރެސް ޕާޓީގެ ޕީޖީ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވެއްޖެ އެވެ. 

ފަލާހު މިފަދައިން ވިދާޅުވީ ޕީއެންސީގެ ފަރާތުން ކުރިއަށްގެންދިޔަ ހުޅުމާލެ ދެކުނު ޖަގަހަ ހުޅުވުމުގެ ރަސްމިއްޔާތުގައި ވާހަކަދައްކަވަމުން ނެވެ. 

މާޒީވި ވެރިކަންތަކުގައި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބާއްވަން ނޫޅުނީ އިހުލާސްތެރިކަން ނެތީމަކަމަށް ފަލާހު ވިދާޅުވި އެވެ. 

ހިނގަމުންމިދާ 20 ވަނަ ރައްޔިތުންގެ މަޖިލީހުގެ ނަތީޖާތަކަށް އަލިއަޅުވާލައްވައި ވާހަކަދައްކަވަމުން ފަލާހު ވިދާޅުވީ މި މަޖިލީހަށް މިވީ ދުވަސްކޮޅުގެ ތެރޭގައި ގާތްގަނޑަކަށް ފަސްދޮޅަހަކަށް ގާނޫނަށް އިސްލާހު ގެނައުމާއި، އަލަށް ހުށަހެޅުނު ގިނަ ގާނުނުތަކެއް ފާސްކޮށްފައިވާކަމަށެވެ. 

ރައީސުލްޖުމްހޫރިއްޔާ ޑރ. މުއިއްޒަކީ ރައްޔިތުންގެ ހައްގުގައި ކުރަންޖެހުނު ކޮންމެ ކަމެއް ކުރައްވާ ވެރިއެއްކަން ސާބިތުކޮށްދެއްވަމުން އަންނަކަމަށް ފަލާހު ވިދާޅުވި އެވެ. 

ރައީސް ގައުމުގެ މުސްތަގުބަލަށް ކުރައްވާ މަސައްކަތްޕުޅުތަކުގައި ކައުންސިލުތަކަކީ ވަރަށް މުހިންމު ރޯލެއް އަދާކުރާ ބައެއް ކަމަށް ވިދާޅުވެ ފަލާހު ވަނީ ކުރިއަށް އޮތް އިންތިހާބުގައިވެސް ވަރަށް ވިސްނުންތެރިކަމާއެކު ވޯޓު ދިނުމަށް އިލްތިމާސްކުރައްވާފަ އެވެ. 

ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަކީ ކޮއްގެންވާނޭކަމެއް ނޫންކަމަށް އިދިކޮޅު ފަރާތްތަކުން ބުނަމުން އަންނައިރު އެކަން އެގޮތަށް ނުކުރެވެންވީ ސަބަބު އިދިކޮޅު ފަރާތްތަކަށް ބުނެ ނުދެވޭކަމަށް ވިދާޅުވެ ފަލާހު ވަނީ ފާޑުވިދާޅުވެފަ އެވެ. 

އަދި ކޮންގްރެސް ޕާޓީން މިކަން ކުރަން އުޅެނީ މިކަމުގައި ރައްޔިތުންނަށް ވާނެ ގިނަ ފައިދާތަކެއް އޮތުމުންކަމަށާއި ވުމާއެކު އަންނަ އޭޕްރީލް މަހުގެ ހަތަރު ވަނަ ދުވަހު އޮންނަ އިންތިހާބުގައި ދެ އިންތިހާބުގެ ރެފަރެންޑަމްއަށް "އާނއެކޭ" ބުނުމަށް ރައްޔިތުންނަށް ފަލާހު ވަނީ އިލްތިމާސްކުރައްވާފަ އެވެ.