ބޭސް އެތެރެކުރުމުގައި ބަލަންޖެހޭ ކަމަކީ ބޭސް އުފެއްދި ތަނަކަށްވުރެ ބޮޑަށް ބޭހުގެ ފެންވަރުކަމަށް ސިއްހީ ވަޒީރު އަބްދުﷲ ނާޒިމު ވިދާޅުވެއްޖެއެެވެ. 

ސިއްހީ ވުޒާރާގެ މަސައްކަތްތަކާ ގުޅޭ މައުލޫމާތު ދެއްވުމަށް ރައީސް އޮފީހުގައި ބޭއްވު ނޫސްވެރިންގެ ބައްދަލުވުމުގައި ވަޒީރު ވިދާޅުވީ ރަނގަޅު ފެންވަރުގެ ކޮލިޓީ ބޭސް އުފައްދަނީ ޔޫރަޕުގައި އެކަނި ނޫން ކަމަށެވެ. އެގޮތުން އިންޑިޔާއާއި ބަންގުލަދޭޝް ފަދަ ގައުމުތަކުގައިވެސް ފެންވަރު ރަނގަޅު ބޭސް އުފައްދާކަމަށް ވަޒީރު ވިދާޅުވިއެވެ. 

"ކޮލިޓީ ރަނގަަޅު ބޭސް ގެނައުން އެއީ އަބަދުވެސް ސިޔާސަތެއް. ކޮލިޓީ ރަނގަޅު ބޭސް އިންޑިޔާގަައިވެސް އުފައްދާނެ. ބަންގުލަދޭޝްގައިވެސް އުފައްދާނެ.،" ވަޒީރު ވިދާޅުވިއެވެ. 

އަދި ރާއްޖެއަށް އެތެރެކުރާ ބޭހުގެ ފެންވަރު ކަށަވަރުކުރުމަށް އެކަށީގެންވާ ހަރުދަނާ އުސޫލުތަކެއް އެކަށައަޅައި، އެކަމަށް އެކަށީގެންވާ ސިޔާސަތުތަކެއް އެކުލަވައިލާ ތަންފީޒުކުރަމުންދާ ކަމަށް ވަޒީރު ވިދާޅުވިއެވެ. އަދި ކުރިއަށް އޮތް ތަނުގައި ގައުމީ ސިއްހީ ލެބޯޓަރީގެ އައު އިމާރާތް ގާއިމުކުރެވި އެންމެ ޒަމާނީ ވަސީލަތްތަކާއެކު ބޭހުގެ ތަހުލީލުތައް ކުރެވެން ފެށުމުން މިހާރަށްވުރ އެ ނިޒާމު ހަރުދަނާވާނެ ކަމުގައިވެސް ވިދާޅުވިއެވެ. 

އިތުރަށް ވަަޒީރު ފާހަގަކުރެއްވީ ޔޫރަޕަަށް ޕާކިސްތާނާއި އިންޑިޔާ ފަދަ ގައުމުތަކުން ބޭސް ގެންދާ ކަމެވެ. އެހެންކަމުން ރާއްޖެއަށް މުހިއްމީ ބޭސް އުފައްދާ ތަނަށްވުރެ ބޮޑަށް އެކަށީގެންވާ ރަނގަޅު ފެންވަރުގެ ބޭސް ރާއްޖެއަށްް ލިބޭނެކަން ކަށަވަރުކުރުން ކަމަށް ވަޒީރު ވިދާޅުވިއެވެ. 

"ޔޫރަޕަށް ގެންދާ ވަރަށް ގިނަ ބޭހަކީ އިންޑިޔާގައި ނޫނީ ޕާކިސްތާނުގައި ނޫނީ އެހެން ތަންތަނުގައި އުފައްދާ ބޭސް. މީގައި މުހިއްމީ އުފައްދާ ތަނެއް ނޫން. އޭގެ ކޮލިޓީ ކުރެވޭ ރަނގަޅު ބޭސް އަޅުގަނޑުމެންނަށް ލިބުން މުހިއްމީ،" ނާޒިމު ވިދާޅުވިއެވެ. 

ނާޒިމު ވިދާޅުވީ ބޭސް ފޯރުކޮށްދިނުމުގައި ސަރުކާރުގެ ފޯކަސް ނުވަތަ ސަމާލުކަންދޭ ކަމަކީ ރަނގަޅު ފެންވަރުގެ ބޭސް ލިބޭނެ ހަރުދަނާ ނިޒާމެއް ގާއިމުކޮށް، އެނިޒާމު ހަރުދަނާކޮށް ކުރިއެރުވުން ކަމަަށެވެ.