ފަތުރުވެރިކަމުގެ ދުނިޔޭގެ އެންމެ ބޮޑު އެއް މައުރަޒު ކަމުގައިވާ އައިޓީބީ ބާލިން ފެއާ އަންނަ އަހަރު ހޮސްޓުކުރާ ގައުމަކަށް ރާއްޖެ ހަމަޖެހިފައިވާކަމަށާއި، މިކަމުގެ ސަބަބުން ދިވެހި ފަތުރުވެރިކަން އިޝްތިހާރުކުރުމުގައި އައު ފުރުސަތުތަކެއް ފަހިވާނެ ކަމުގައި ވިޒިޓް މޯލްޑިވްސްއިން ބުނެފިއެވެ. 

މިހާރު ޖަރުމަންވިލާތުގައި ކުރިއަށްދާ އައިޓީބީ ބާލިން 2026 މައުރަޒުގައި ގާއިމުކޮށްފައި ހުރި ރާއްޖޭގެ އެގްޒިބިޝަން ސްޓޭންޑުގައި ބޭއްވި ހަފުލާއެއްގައި، އަންނަ އަހަރު އައިޓީބީ ފެއާ ރާއްޖެއިން ހޯސްޓުކުރުމާ ގުޅޭ އެއްބަަސްވުމުގައި ސޮއިކުރެއްވީ ވިޒިޓް މޯލްޑިވްސް ކޯޕަރޭޝަނުގެ ސީއީއޯ އަދި މެނޭޖިން ޑިރެކްޓަރ އިބްރާހީމް ޝިއުރީއާއި، އައިޓީބީ ފެއާ އިންތިޒާމުކުރާ މެސޭ ބާލިންގެ ސީއީއޯ ޑރ.މާރިއޯ ޓޯބިއަސްއެވެ. 

ހޯސްޓުކުރާ ގައުމުގެ ހައިސިއްޔަތުން އަންނަ އަހަރުގެ މާޗު މަހުގެ 15 ވަނަ ދުވަހު އައިޓީބީ ފެއާ 2027 ހުޅުވުމަށް ބާއްވާ ހާއްސަ ގާލާ ނައިޓް ބާއްވާނީ ރާއްޖެއިންނެވެ. އަދި މާރިޗު 16 އިން 18 އަށް މި ފެއާ ކުރިއަށްދާއިރު ރާއްޖޭގެ ފަރާތުން ތަފާތު ހަރަކާތްތައް ކުރިއަށްގެންދާނެއެވެ. އޭގެ ތެރޭގައި ސަގާފީ ހުށަހެޅުންތަކާއި، ނެޓްވޯކިން އިވެންޓުތައް ހިމެނޭނެއެވެ. 

މި އެއްބަސްވުމުގައި ސޮއިކުރެއްވުމަށްފަަހު ޑރ.ޓޯބިއަސް ވިދާޅުވީ ދިވެހިރާއްޖޭގެ ގުދުރަތީ ރީތިކަމާއި ރާއްޖެއިން ފޯރުކޮށްދޭ ފަތުރުވެރިކަމުގެ މަތީ ފަންތީގެ ހިދުމަތްތައް އިޝްތިހާރުކުރުމަށް އެންމެ އެކަށީގެންވާ މުނާސަބު މަންސައަކީ އައިޓީބީ މައުރަޒު ކަމަށެވެ. އަދި އެ މައުރަޒަކީ ދުނިޔޭގެ އެކި ކަންކޮޅުތަކުން ފަތުރުވެރިކަމުގެ މާހިރުން ވަޑައިގަންނަވާ މައުރަޒަކަށްވާތީ އެ މައުރަޒަކީ ރާއްޖެ ފަދަ ގައުމުތަކަށް ލިބިގެންދާ މުހިއްމު ފުރުސަތެއްކަމަށް އޭނާ ވިދާޅުވިއެވެ. 

ވިޒިޓް މޯލްޑިވްސްއިން ބުނެފައިވަނީ ހޯސްޓްކުރާ ގައުމުގެ ގޮތުގައި ރާއްޖެ ހަމަޖެހުމުން، ރާއްޖޭގެ ފަތުރުވެރިކަމުގެ ހުރިހާ ސެކްޓާތަކެއް އިޝްތިހާރުކޮށް، ރާއްޖެއިން ފަތުރުވެރިންނަށް ލިބެންހުރި ތަފާތު ތަޖުރިބާތަަކުގެ މައުލޫމާތު ފުޅާ ދާއިރާއެއްގައި ފޯރުކޮށްދިނުމަށް ގިނަ ފުރުސަތުތަކެއް ފަހިވާނެ ކަމަށެވެ. 

އެންމެ ފަހުން ރާއްްޖެއަށް އައިޓީބީ ފެއާ ހޯސްޓުކުރުމުގެ ފުރުސަތު ލިބުނީ ދިހަ ވަރަކަށް އަހަރު ކުރިން 2016 ވަނަ އަހަރުއެވެ. އެ އަހަރު ރާއްޖެއިން ކުރިއަށްގެންދިޔަ ހަރަކާތްތަކަށް ވަރަށް ބޮޑު ތަރުހީބެއް ލިބުނެވެ. ހާއްސަކޮށް ރާއްޖޭގެ ސަގާފީ ހަރަކާތްތަކަށް ގިނަ ބައެއްގެ ޝައުގުވެރިކަން ލިބުނެވެ.