ރަށްރަށުގެ ކައުންސިލު އިމާރާތްތައް އައުކުރުމަށް ސަރުކާރުން ފަށާފައިވާ މަޝްރޫއުގެ ދަށުން ކޮންޓްރެކްޓާ ފައިނޭންސްގެ އުސޫލުން އާރްސީސީއާ ހަވާލުކޮށްގެން ހިންގަމުންދާ 55 ކައުންސިލު އިމާރާތުގެ މަސައްކަތް މި އަހަރުގެ ޖުލައި މަހުގެ ނިޔަލަށް ނިންމުމަށް އަމާޒު ހިފާފައިވާކަމަށް ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ. 

އެ ވުޒާރާގެ މަސައްކަތްތަކާ ގުޅޭ މައުލޫމާތު ދެއްވުމަށް އިއްޔެ ރައީސުލްޖުމްހޫރިއްޔާގެ އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައި ވަޒީރު ވިދާޅުވީ ނިމުނު އަހަރުގެ އޯގަސްޓު މަހުގައި ފެށި މަސައްކަތް ވަރަށް ބާރަށް ކުރިއަށްދާ ކަމަށެވެ. އަދި އަމާޒަކީ އެ މަސައްކަތް ޖުލައި މަހުގެ ނިޔަލަށް ނިންމައިލުންކަމަށްވެސް ވަޒީރު ވިދާޅުވިއެވެ. 

"މި މަސައްކަތް އަޅުގަނޑުމެން ހަވާލުކުރީ މިދިޔަ އަހަރުގެ އޯގަސްޓު މަހުގެ 16 ވަނަ ދުވަހު. އަޅުގަނޑުމެންގެ އަމާޒަކީ މި އަހަރުގެ ޖުލައިގެ ނިޔަލަށް މި މަސައްކަތް ނިންމުން. މިހާތަނަށް 54 ރަށުގައި ވަރަށް ބާރަށް މަސައްކަތްތައް ކުރިއަށްދޭ، އަނެއް ރަށުގައިވެސް މަސައްކަތް ފެށިގެން ކުރިއަށްދޭ. މައިގަނޑު ގޮތެއްގައި ގިނަ ރަށްރަށުގައި މިހާރު ކުރަމުންދަނީ ފުރާޅު ހިޔާކުރުމުގެ މަސައްކަތް،" ވަޒީރު ވިދާޅުވިއެވެ. 

އިތުރަށް އާދަމް ޝަރީފު ވިދާޅުވީ އަލަށް އަޅާ އޮފީސް އިމާރާތްތަކަކީ ޖާގަ ތަނަވަސް އިމާރާތްތަކެއް ކަމަށާއި، އެތަންތަނުގައި ކައުންސިލަރުންނާއި، ކައުންސިލުތަކުގެ ރައީސުންނާއި ނައިބުރައީސުންނަށް ވަކި ކޮޓަރިތައް ހެދި، ބައްދަލުވުންތައް ބާއްވާނެ ޖާގައާއި، އަންހެނުންގެ ތަރަައްގީއަށް މަސައްކަތްކުރާ ކޮމިޓީތަކަށް މަސައްކަތްކުރެވޭނެ ޖާގަވެސް ހުންނާނެ ކަމުގައި ވަޒީރު ވިދާޅުވިއެވެ. 

މި މަޝްރޫއު ހަވާލުކޮށްފައިވަނީ އިމާރާތްކުރުމުގެ އިތުރަށް އެތަންތަނަށް ބޭނުންވާ ފަރުނީޗަރުވެސް ގާއިމުކޮށް ފިނިޝިންގެ ހުރިހާ މަސައްކަތެއް ނިންމުމަށްފަހު، ހަވާލުކުރާ ދުވަހުން ފެށިގެން އެ އިމާރާތްތަކުގެ ބޭނުން ހިފޭ ގޮތަށް އެ ތަންތަނުގެ މަސައްކަތް ނިންމާ ގޮތަށް ހަވާލުކުރެވިފައިވާ މަޝްރޫއެއްކަން ވަޒީރު ފާހަގަކުރެއްވިއެވެ. 

"އަޅުގަނޑުމެންނަށް ގަބޫލުކުރެވޭ ގޮތުން މިއަންނަ މަހުގެ ތެރޭގައި އެތަންތަނަށް ބޭނުންވާ ފަރުނީޗަރުވެސް އަންނަން ފަށާނެ. އަޅުގަނޑުމެން ގަބޫލުކުރަނީ މި މަސައްކަތްތަކާއެކު ކައުންސިލުތަކަށް މަސައްކަތްކުރުމުގެ ވަރަށް ރަނގަޅު މާހައުލެއް އުފެދިގެންދާނެކަމަށް،" އާދަމް ޝަރީފު ވިދާޅުވިއެވެ. 

މި ކައުންސިލު އިމާރާތްތަކުގެ އިތުރަށް ސަރުކާރުގެ ޕީއެސްއައިޕީ ބަޖެޓުން ކައުންސިލު އިމާރާތް އެޅުމަށް ކުރަމުންދާ މަސައްކަތްތަކުގެ ތެރެއިން ހަ ރަށެއްގެ ކައުންސިލު އިމާރާތުގެ މަސައްކަތް މިހާތަނަށް ނިންމާފައިވާކަން ވަޒީރު ހާމަކުރެއްވިއެވެ. އެއީ ތ.ކިނބިދޫއާއި، ށ.ނޫމަރާއާއި، ލ.ކަލައިދޫއާއި، މ.ރަތްމަންދޫ މ.ވޭވަށް އަދި އދ.ހަންޏާމީދޫ ކައުންސިލުގެ އިމާރާތެވެ. 

އޭގެ އިތުރަށްވެސް ސަރުކާރުގެ ބަޖެޓުން ހަަރަދުކޮށްގެން އިތުރު ބައެއް ކައުންސިލުތަކުގެ އިމާރާތް އެޅުމުގެ މަސައްކަތް މިހާރުވެސް ކުރެވެމުންދާކަން ވަޒީރު ފާހަގަކުރެއްވިއެވެ.