ބިން ހަވާލުނުކޮށްގެން 57 މަޝްރޫޢުއެއް ނުފެށި އެބައޮތް ކަމަށާ އެއީ ޤަބޫލުކުރެއްވޭނެ ކަމެއް ނޫން ކަމުގައި ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒު ވިދާޅުވާނީ ހެކި ހުރީމަ ކަމަށް ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު ވިދާޅުވެއްޖެ އެވެ.

ވުޒާރާގެ މަސައްކަތްތަކުގެ އެންމެ ފަހުގެ މައުލޫމާތު ހާމަކުރެއްވުމަށް ރައީސުލްޖުމްހޫރިއްޔާގެ އޮފީހުގައި އިއްޔެ ކުރިއަށްދިޔަ ނޫސްވެރިންގެ ބައްދަލުވުމުގައި "ދިވެހީންގެރާއްޖެ ތަރާވީސް" ގައި ވާހަކަފުޅު ދައްކަވަމުން ބިން ހަވާލުނުކޮށްގެން 57 މަޝްރޫޢުއެއް ނުފެށި އެބައޮތް ކަމަށް ރައީސް ވިދާޅުވެފައިވާތީ އެއީ ކޮން ރަށްތަކެއް ކަން އޮޅުންފިލުވައި ދިނުމަށް ނޫސްވެރިއަކު ވަނީ އެދިފަ އެވެ. 

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވުޒާރާއަކީ ރަށްރަށުގައި މަޝްރޫއުތައް ހިންގާ ކުންފުނިތަކާ އެކު މަސައްކަތް ކުރާ އަދި އެ ރެކޯޑުތައް ބަލަހައްޓާ ވުޒާރާއަކަށް ނުވާތީ އެ ލިޔެކިޔުންތައް ނެތް ކަމަށެވެ. އެހެން ނަމަވެސް ރައީސް އެފަދަ ވާހަކަފުޅެއް ވިދާޅުވާނީ ހެކި ހުރީމަ ކަމަށް ވަޒީރު ވިދާޅުވި އެވެ. އަދި ސީދާ މަޝްރޫއުތަކުގެ ރެކޯޑުތައް ނުބެލެހެއްޓި ނަމަވެސް ސަރުކާރުން ހިންގަން ރާާފައިވާ ތަރައްގީގެ މަޝްރޫއުތައް ހިންގުމަށް ބައެއް ރަށްރަށުގައި ގޮންޖެހުންތައް ދިމާވާކަމުގެ ކަންބޮޑުންވުންތައް އެކި ސިފަސިފައިގައި ވުޒާރާއާ ހަމައަށް ވެސް އައިސްފައިވާކަމަށް ވަޒީރު ވިދާޅުވި އެވެ. 

އެމްޑީޕީއަށް ނިސްބަތްވާ ބައެއް ކައުންސިލުތަކުން މި ސަރުކާރުގެ މަޝްރޫތަކަށް ހުރަސް އަޅަނީ ނިމިދިޔަ ސަރުކާރުން ކުރަން ބޭނުންވެފައި ހުރި އެކަމަކު ނުކުރެވި ހުރި ކަންކަން ރައީސް މުއިއްޒު ކުރައްވަފާނެތީ ސިޔާސީ ބޭނުމެއް ހާސިލުކުރުމަށް ކަމަށް ވަޒީރު ވިދާޅުވި އެވެ. 

އާޓިފިޝަލް ބީޗުގައި މިދިޔަ މަހުގެ 27 ވަނަ ދުވަހުގެ ރޭ އޮތް ތަރާވީހުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އިދިކީލަ ކައުންސިލްތަކެއް އޮތުމަކީ ސަރުކާރުން ބޭނުންވާ ސްޕީޑްގައި ތަރައްޤީ ގެނައުމަށް އޮތް ވަރަށް ބޮޑު ގޮންޖެހުމެއް ކަމަށެވެ.

މިހާރުވެސް އެކަން ތަޖުރިބާ ކުރެއްވިފައިވާ ކަމަށް ވިދާޅުވި އެވެ. އެގޮތުން ރައީސް ވިދާޅުވީ ކައުންސިލްތަކުން ބިން ހަވާލުނުކޮށްގެން މިވަގުތުވެސް 57 މަޝްރޫޢުއެއް ނުފެށި އެބައޮތް ކަމަށެވެ. އެކަމުން ހުރިހާ ގެއްލުމެއް ލިބެނީ ރައްޔިތުންނަށް ކަމުގައި ރައީސް ވިދާޅުވި އެވެ. އަދި އެއީ ޤަބޫލުކުރެއްްވޭނެ ކަމެއް ނޫން ކަމުގައި ވިދާޅުވި އެވެ.

ރައީސް ވިދާޅުވީ ކައުންސިލުތަކުން އަޅާ ހުރަހުން ސަރުކާރުން ރައްޔިތުންނަށް ވެފައިވާ ވަޢުދުތައް ނުފުއްދި އޮތުމަކީ އެއްވެސް ހަމައަކުން ޤަބޫލުކުރެއްވޭނެ ކަމެއް ނޫނެވެ. އެހެން ކަމުން ސަރުކާރަށް އެއްބާރުލުން ދޭނެ ކައުންސިލްތަކެއް އިންތިޚާބު ކުރުމަކީ ވަރަށް މުހިންމު ކަމެއް ކަމުގައި ރައީސް ވިދާޅުވި އެވެ.

އަދި އެގޮތަށް ނިންމައިފިނަމަ ވެވަޑައިގެންފައިވާ ވަޢުދުފުޅުތައް ފުއްދެވުމަށް ވަރަށް ފަސޭހަ ވާނެ ކަމުގައި ރައީސް ވިދާޅުވި އެވެ.