ބޭންކު ލޯނު މެދުވެރިކޮށް އަތްފޯރާ ފަށުގައި ގެދޮރު ގަތުމުގެ ފުރުސަތު ދިނުމުގެ ގޮތުން ސަރުކާރުން ތައާރަފުކުރާ އެފޯޑަބަލް ހޯމް އޯނާޝިޕް ޕްރޮގުރާމުގެ ދަށުން ހުޅުމާލޭގައި ތަރައްގީކުރާ 1،000 ހައުސިން ޔުނިޓުގެ ތެރެއިން 2 ކޮޓަރީގެ ފުލެޓުތައް 1.8 މިލިއަން ރުފިޔާ އަދި ތިން ކޮޓަރީގެ ފުލެޓުތައް 2.3 މިލިއަން ރުފިޔާއަށްވުރެ އަގު ބޮޑުނުވާނެ ގޮތަށް އަގު ހިފަހެއްޓިގެންދާނެ ކަމުގައި އިމާރާތްކުރުމާއި ބިނާރާއި ގެދޮރުވެރިކަމާ ބެހޭ ވަޒީރު ޑރ.އަބްދުﷲ މުއްތަލިބު ވިދާޅުވެއްޖެއެވެ. 

އެ ވުޒާރާގެ މަސައްކަަތްތަކާ ގުޅޭ މައުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ސަރުކާރުން ކުރިއަށްގެންދާ ހައުސިން މަޝްރޫއުތަކުގެ މައުލޫމާތު ދެއްވަމުން ވަޒީރު ވިދާޅުވީ މި ޕްރޮގުރާމަކީ މޯގޭޖު މެދުވެރިކޮށް ބޭންކުން ލޯނެއް ނަގައިގެން ގެދޮރު ގަތުމުގެ ގާބިލުކަން ހުރި އާއިލާތަކަށް ފުރުސަތު ދިނުމުގެ ގޮތުން ހިންގާ ޕްރޮގުރާމެއް ކަމަށެވެ. 

މި ޕްރޮގުރާމުގެ ދަށުން 1،000 ހައުސިން ޔުނިޓު ތަރައްގީކުރުމަށް އަމިއްލަ ކުންފުނިތަކަށް މިހާރު ފުރުސަތު ހުޅުވާލާފައިވާކަން ފާހަގަކުރައްވަމުން ވަޒީރު ވިދާޅުވެފައިވަނީ މި ފުލެޓުތައް އެޅުމަށް ބިން ދޫކުރަނީ ހިލޭ ކަމަށާއި އަދި އިތުރު ބައެއް ލުއިތައްވެސް ދިނުމާއެކު އެތަންްތަން ވިއްކާނީ ސަރުކާރުން ކަނޑައަޅާ އަގުތަކެއްގައި ކަމަށެވެ. 

"އަޅުގަނޑުމެން ބިން ހިލޭ ދިނުމާއެކު އިތުރު އިންސެންޓިވްތަކެއް ދީގެން ފަސްޓް ޓައިމް ހޯމް ބަޔާސްއަށް އާއިލީ ބޯހިޔާވަހިކަމުގެ ސްކީމުގެ ތެރެއިން ކުރިމަތިލާ މޯގޭޖު ނަގައިގެން ގަންނަން ބޭނުންވާ ފަރާތްތަކަށް އަގު ކޮންޓުރޯލުކުރެވިގެން މިތަންތަަން ވިކިގެންދާނެ،" ވަޒީރު ވިދާޅުވިއެވެ. 

ވަޒީރުވަނީ އެތަންތަނުގެ އަގު ކޮންޓުރޯލުކުރުމަށް ނިންމާފައިވާ ރޭންޖު ނުވަތަ މިންގަނޑުގެ ތަފުސީލުތައް ނޫސްވެރިންނާ ހިއްސާކުރައްވާފައެވެ. ވަޒީރު ވިދާޅުވި ގޮތުގައި ދެ ކޮޓަރީގެ އެޕާޓުމެންޓުތަކުގެ އަގު 1.8 މިލިއަން ރުފިޔާ އަދި ތިން ކޮޓަރީގެ އެޕާޓްމެންޓުތަކުގެ އަގު 2.3 މިލިއަން ރުފިޔާއަށްވުރެ ބޮޑުނުވާނެ ގޮތަށް ވިއްކުމަށް ޝަރުތުކުރެވިގެންދާނެއެވެ. 

"މިއީ މާކެޓުގައި މިތަންތަން ގަންނަން ލިބެން ހުރި އަގުތަކާ އަޅާބަލާއިރު އެކަށިގެންވާ އަގެއް. މީގެ ބޭނުމަކީ ސޯޝަލް ހައުސިން ސްކީމުތަކުން ނިކަމެތިންނަށް ގެދޮރު ލިބޭއިރުގައި، އެ ފުދުންތެރިކަން ހުރެގެން ބޭންކުން މޯގޭޖު ނަގައިގެން ގަންނަން ބޭނުންވާ ފަރާތްތަކަށް ފުރުސަތު ހޯދައިދިނުން،" ވަޒީރު ވިދާޅުވިއެވެ.