އަބަަދު ކެމްޕެއިނުގެ ދިލައިގެ ތެރޭގައި ތިބުމަކީ މިހާރު ރައްޔިތުން ބަލައިގަންނަ ކަމެއް ނޫންކަމަށާއި، ވަކި ދުވަސްވަރެއްގައި ކެމްޕެއިންތައް ކުރިއަށްގެންގޮސް ނިންމައިލުމަކީ ރާއްޖޭގެ އިޖުތިމާއީ ހަމަޖެހުމާއި ދޭދޭ ގުޅުންތަކަށްވެސް އެންމެ ރަނގަޅު ގޮތްކަމަށް ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ. 

މިއަދު މައްޗަންގޮޅި އުތުރު ދާއިރާގައި ޕީޕަލްސް ނޭޝަނަލް ކޮންގްރެސް ޕާޓީން ކުރިއަށްގެންދިޔަ "ދޮރުން ދޮރަށް" ހަރަކާތުގައި ބައިވެރިވެވަޑައިގެން އެމްއެމްޓީވީއަށް ދެއްވި ބަސްދީގަތުމެއްގައި ވަޒީރު ވިދާޅުވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގަައި ބޭއްވުމުން ވަރަށް ގިނަ ފައިދާތަކެއް ރައްޔިތުންނަށް ލިބިގެންދާނެ ކަމަށެވެ. 

ދެ އިންތިހާބު އެއް ދުވަހެއްގައި ބޭއްވުމުގެ ފައިދާތަކުގެ ތެރެއިން އެއްކަމެއްގެ ގޮތުގައި ވަޒީރު ފާހަގަކުރެއްވީ އިންތިހާބަށް ދައުލަތުން ކުރާ ހަރަދު ކުޑަކުރެވުމުގެ ސަބަބުން ސަލާމަތްކުރެވޭ ފައިސާއިން ތަރައްގީގެ މަޝްރޫއުތަކަށް ހަރަދުކުރެވުމެވެ. 

އެމްޑީޕީގެ ވެރިކަމުގައި ބޭއްވި ކޮމަންޑޫ ބައި-އިލެކްޝަނުން މިސާލު ދައްކަވަަމުން ވަޒީރު ވިދާޅުވީ އެ އިންތިހާބުގެ ދުވަސްވަރު މަހެއްހައި ދުވަސްވަރު މަސްވެރިން މަހަށް ނުފުރައި ކެމްޕެއިނަށް ހުސްވެގެން ތިބެންޖެހުނުކަން ފާހަގަކުރެއްވުނުކަމަށާއި، ދެ އިންތިހާބު އެއް ދުވަހެއްގައި ބޭއްވުމުން އެގޮތަށް އިންތިހާބުގެ ކެމްޕެއިނަށް ހުސްވެގެން މަސައްކަތް ހުއްޓާލައި، އާއްމު ދިރިއުޅުމުގެ ކަންކަން މަޑުޖައްސައިލަންޖެހޭ ޖެހުމަށް ނިމުމެއް ގެނެވިގެންދާނެ ކަމަށެވެ. 

އަދި ރާއްޖެއަކީ ކުޑަކުޑަ ގައުމަކަށްވާއިރު އެއް އާއިލާއެއްގެ ތެރޭގައިވެސް ސިޔާސީ ގޮތުން ތަފާތު ވިސްނުންތައް އޮންނަ އޮތުމަކީ ތަބީއީ ކަމެއްކަމަށްވީ ނަމަވެސް، އަބަދު އިންތިހާބުތަކުގެ ކެމްޕެއިނުގެ ހުމުގައި އެ ފޯރީގައި އާއިލާތައް ތިބުމަކީ އެންމެ ރަނގަޅު ގޮތެއް ނޫންކަމަށް ވަޒީރު ވިދާޅުވިއެވެ. 

"ސިޔާސީ ފިކުރު އެހެން ތަފާތުވާ ކަންކަމުގެ ތެރޭގައި ޝާމިލުވެގެން އުޅެންޖެހުމަކީ މިހާރު ރައްޔިތުން ގަބޫލުކުރާނެ ކަމެއް ނޫން. އަަޅުގަނޑުމެން އަބަދު ކެމްޕެއިންގެ ތެރޭގައި އުޅެންޖެހެމުން އެނަގަންޖެހޭ ދިލައިގެ ބަދަލުގައި ވަކި މުއްދަތެއްގެ ތެރޭގައި ކެމްޕެއިނުގެ ކަންކަން ނިމުމުން އިޖުތިމާއީ ގޮތުން ރަނގަޅުވެގެންދޭ،" އާދަމް ޝަރީފު ވިދާޅުވިއެވެ. 

އަދި ރައްޔިތުންގެ ކައިރިއަށް ދާންޖެހުން މަދުވާނެކަމަށް ބުނެ އިދިކޮޅު ޕާޓީތަކުން ދައްކާ ވާހަކަތަކަށް ރައްދުދެއްވައި އާދަމް ޝަރީފު ވިދާޅުވީ އެއީ މީގެ ސާޅީހަކަށް އަހަރުކުރިން ވެރިކަމުގައި ތިއްބެވި ބޭފުޅުން ގެންގުޅުއްވި ބޯދާ ވިސްނުންފުޅެއް ކަމުގައިވާ އިންތިހާބުތަކާ ދިމާކޮށް ރައްޔިތުން ގާތަށް ދިއުމުގެ ވިސްނުން ކަމަށެވެ. މިއަދުގެ ރައީސަކީ އިންތިހާބެއް ނެތަސް ރައްޔިތުންނާއެކު އުޅުއްވާ ރައްޔިތުންގެ ހިޔާލާއި މަޝްވަރާ އަޑުއައްސަވައި އޮޅުންފިލުއްވާ ބޭފުޅެއްކަން ވަޒީރު ފާހަގަކުރެއްވިއެވެ. 

"ރައީސް އަބަދުވެސް އުޅުއްވަނީ ރައްޔިތުންނާއެކު. އެ ސަބަބާހުރެ ރައްޔިތުންގެ ބައިވެރިވުމާއި ހިޔާލު ހޯދުމަށް ކޮންމެހެން ކުރަންޖެހޭ ކަމެއް ނޫން އިންތިހާބުތައް ގިނަ ކުރުމަކީ،" އާދަމް ޝަރީފު ވިދާޅުވިއެވެ.