މި ސަރުކާރުން ހިންގާ ގެދޮރުވެރިކަމުގެ ސްކީމުތަކުގެ ތެރެއިން ފުލެޓު ދޫކުރުމަށް ހިންގާ ސްކީމުތަކުގައި ވަކިވަކި އިދާރާތަކަށް ހާއްސަކޮށް ކެޓަގަރީތަކެއް ކަނޑައަަޅާފައިވަނީ އެ އިދާރާތަކުގައި މަސައްކަތްކުރާ ހުނަރުވެރި މުވައްޒަފުން އެ އިދާރާތަކުގައި ބޭތިއްބުމަށް މަގުފަހިކުރުމަށް ކަމުގައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ.އަބްދުﷲ މުއްތަލިބު ވިދާޅުވެއްޖެއެވެ. 

އެ ވުޒާރާއިން ކުރަމުންދާ މަސައްކަތްތަކުގެ މައުލޫމާތު ނޫސްވެރިންނާ ހިއްސާކުރުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރުވަނީ އިދާރާތަކަށް ހާއްސަކުރި ކެޓަގަރީތަކުގެ ޝަރުތުތައް ލުއިކުރީ ސިޔާސީ މުވައްޒަފުންނަށް އެ ކެޓަގަރީތަކުގެ ފުލެޓުތައް ދިނުމަށް މަގުފަހިކުރުމަށް ކަމުގައި ބުނެ ބައެއް ފަރާތްތަކުން ސަރުކާރަށް އަމާޒުކުރި ތުހުމަތުތައް ދޮގުކުރައްވާފައެވެ. 

"އެ އުސޫލު މިހާރު އޮތް ގޮތުންވެސް ސިޔާސީ މީހުންނަށް ކުރިމަތިލެވޭ ގޮތަކަށް ނޫން އޮތީކީ. ސަރުކާރުގެ ވިސްނުމެއް ނެތް ސިޔާސީ މީހުންނަށް އާއްމު ކެޓަގަރީތަކުގެ ބޭރުން ހާއްސަ ކެޓަގަރީއެއް ހަދައިގެން ކުރިމަތިލެވޭ ގޮތް ހެދުމަށް،" ވަޒީރު ވިދާޅުވިއެވެ. 

ކުރިން އުސޫލުގައި އޮންނަނީ އިދާރާތަކަށް ހާއްސަކުރާ ކެޓަގަރީއަށް ކުރިމަތިލެވޭނީ ފަސް އަހަރު އެ އިދާރާއެއްގައި މަސައްކަތްކުރަމުން ކަމަށެވެ. ނަމަވެސް މިހާރު އުސޫލަށް ގެނައި ބަދަލާއެކު އިދާރާއެއްގައި މަސައްކަތްކުރާތާ އެއް އަހަރުވީ މުވައްޒަފުންނަށްވެސް މި ކެޓަގަރީގެ ދަށުން ކުރިމަތިލެވޭނެއެވެ. މުއްތަލިބު ވިދާޅުވި ގޮތުގައި އެއް އަހަރަށް ބަދަލުކުރީ ކިޔަވައިގެން ތިބި ހުނަރުވެރި މީހުން ވަޒީފާގައި ތިބޭނެ މަގެއް ފަހިކުރުންކަމަށްވާއިރު، މިހާރު ވަރަށް ގިނަ މީހުންނަކީ އެއް ތަނުން އަނެއް ތަނަށް ވަޒީފާ ބަދަލުވާ ބަޔަކަށްވާއިރު، ފަސް އަހަރު އެއް އިދާރާއެއްގައި މަސައްކަތްކުރުން ލާޒިމުކުރުމުން ހުނަރުވެރި ވަރަށް ގިނަ މީހުންނަށް ހާއްސަ ކެޓަގަރީތަކުން ކުރިމަތިލުމުގެ ފުރުސަތު ގެއްލިގެންދާތީއެވެ. 

"އެއް އަހަރަށް ބަދަލުކުރުމުގެ ބޭނުމަކީ އޭނާއަކީ ކުރިން އެހެން އިދާރާއެއްގައި މަސައްކަތްކުރި މީހަކަށްވިޔަސް އެ އިދާރާއަށް ބަދަލުވުމަށްފަހު އޭނާއަކީ އެ އިދާރާއަށް މުހިއްމު މީހެއްނަމަ އެ އިދާރާއެއްގެ ކެޓަގަރީން ފުލެޓަށް ކުރިމަތިލުމުގެ ފުރުސަތު ދިނުން،" ވަޒީރު ވިދާޅުވިއެވެ. 

ސިޔާސީ މީހުންނަށް ކުރިމަތިނުވެލޭ ސަބަބުތަކުގެ ތެރޭގައި އެ އިދާރާއަކަށް ހާއްސަ ކެޓަގަރީން ފުލެޓު ލިބުމުން އެ މުވައްޒަފަކު އެ އިދާރާގައި ހިދުމަތްކުރަންޖެހޭ ގޮތް ނުވަތަ ދެމިހުންނަންޖެހޭ މުއްދަތު ފަދަ ކަންކަން ކަނޑައެޅުމުގެ އުސޫލު އެ އިދާރާއަކަށް ދީފައި އޮތުން ވަޒީރު ފާހަގަކުރެއްވިއެވެ. އެއީ ސިޔާސީ މުވައްޒަފުންގެ މަަސައްކަތާ ގުޅޭ އެންމެހައި ކަންކަމެއް ކަނޑައަޅުއްވާނީ ރައީސްކަމަށްވާތީއެވެ. 

"އިދާރާތަކަށް އޮންނަ ބާރެއް ނޫން ސިޔާސީ މީހުން ވަޒީފާ އަދާކުރާނެ ގޮތެއް ނުވަތަ މުއްދަތެއް ފަދަ ކަންކަން ކަނޑައެޅުމަކީ،" ވަޒީރު ވިދާޅުވިއެވެ. 

ވަޒީރު ވިދާޅުވީ ހާއްސަ ކެޓަގަރީތައް ކަނޑައަޅާފައިވާ އިދާރާތަކަށް ބޭނުންވާ މުވައްޒަފުންގެ ދާއިރާތައް ކަނޑައަޅައި އެ މުވައްޒަފުން ހިފަހެއްޓުމަށްޓަކައި ފުލެޓު ދޭއިރު އެ މުވައްޒަފުންނާ މަތިކުރާނެ ޝަރުުތުތައް ކަނޑައެޅުމުގެ ބާރު އެ އިދާރާއަށް ސަރުކާރުން ދޭނެ ކަމަށެވެ. 

އަދި މިފުރުސަތު އިދާރާތަކަށް ދެނީ ގިނަ ދުވަސްވީ މުވައްޒަފުންނަށް ފުލެޓު ދިނުމަށް ނޫންކަމަށާއި، ނަމަަވެސް އެ އިދާރާއަކަށް ކޮންމެހެން ބޭނުންވާ ހުނަރުވެރި އިލްމީ ގާބިލު މީހުން އެތަންތަނުގެ ވަޒީފާގައި ބޭތިއްބުމަށް ނުވަތަ ރިޓެއިންކުރުމަށް ބާރުއެޅުމުގެ ގޮތުންކަަމަށްވެސް ވަޒީރު ވިދާޅުވެފައިވެއެވެ.