ކޮލަމާފުށި ކައުންސިލުން އެރަށުގައި ކުރިއަށް ގެންދިޔަ ތަރައްގީގެ މަޝްރޫއުތަކެއް ހިންގުމުގައި ކޮރަޕްޝަނަށް މަގުފަހިވާގޮތަށް އަމަލުކުރިކަމުގެ ތުހުމަތު ކުރެވޭތީ މައުލޫމާތު ހޯދަން އިންފޮމޭޝަން ކޮމިޝަނަރުގެ އޮފީހަށް ހުށަހަޅައިފި އެެވެ. 

މިއީ ކޮލަމާފުށި ކައުންސިލުން ކޮރަޕްޝަނަށް މަގުފަހިވާ ކަންތައްތަކެއް ކޮށްފައިވާކަމަށް ތުހުމަތު ކުރެވޭތީ އަމިއްލަ ބަޔަކު މައުލޫމާތު ހޯދުމަށް އައިކޮމްއަށް ހުށަހެޅި ހުށަހެޅުމެކެވެ.

މި މައްސަލައިގައި ތަރައްގީގެ މަޝްރޫއުތައް ގެންދިއުމަށް ބަޖެޓް އެލޮކޭޓް ކުރުމަށް ބޭއްވި ކައުންސިލް ބައްދަލުވުމެއް ބޭއްވިފައިވާނަމަ އެބައްދަލުވުމުގެ ޔައުމިއްޔާ އަދި ބިޑުގެ ތަފްސީލު ތައް ދިނުމަށް ވެސް ވަނީ އެދިފަ އެވެ. 

އައިކޮމްއިން ހޯދަން އެދިފައިވާ މައުލޫމާތު: 

- ކޮލަމާފުށީ އުތުރު ފަރާތުގެ ބީޗްގައި ކައުންސިލްގެ ހަރަދުގައި ކުޑަކުދިންގެ ޕްލޭސެޓެއް ބުޑުއަޅައި އިންސްޓޯލްކުރުމަށް ހަރަދުކޮށްފައިވަނީ ކިހާ މިންވަރެއްތޯ؟ މަސައްކަތްކުރުމަށް އެއްވެސް ބަޔަކާއި ހަވާލުކޮށްފައިވާނަމަ ހަވާލުކުރީ ކޮންބަޔަކާއިތޯ؟ އަދި ކޮންއަގަކަށްތޯ؟ އަދި އިއުލާނެއް ކޮށްފައިވޭތޯ ؟ 

- ކޮލަމާފުށީ ރިންގރޯޑްގައި މަގުބައްތި ހަދައި ބުޑުއަޅައި ހަރުކޮށް ވައިރު އަޅަން ކޮނެ ވައިރު އެޅުމަށް ކައުންސިލުން ހަރަދުކޮށްފައިވަނީ ކިހާ މިންވަރެއްތޯ؟ މަސައްކަތްކުރުމަށް އެއްވެސް ބަޔަކާއި ހަވާލުކޮށްފައިވާނަމަ ހަވާލުކުރީ ކޮން ކޮންބަޔަކާއިތޯ؟ އަދި ކޮންއަގަކަށްތޯ؟ އަދި މި މަސައްކަތްތައް ކުރުމަށް އިއުލާނެއް ކޮށްފައިވޭތޯ ؟ 

- ސްކައި ޖަމިއްޔާއަށް ދީފައިވާ ބިމެއްގައި ކޮލަމާފުށީ މުހައްމަދު ސައީދު ޕާކް ކައުންސިލްގެ ހަރަދުގައި ހަދާފައިވަނީ ޖަމިއްޔާއާއި ކައުންސިލާއި ދެމެދު އެއްބަސްވުމެއް ހެދިފައިވޭތޯ؟ ހަދާފައިވާނަމަ އެއްބަސްވުމުގެ ކޮޕީ އަދި ކައުންސިލުން މިމަސައްކަތަށް ހަރަދުކޮށްފައިވަނީ ކިހާ މިންވަރެއްތޯ؟ މަސައްކަތްކުރުމަށް އިއުލާނެއް ކޮށްފައިވޭތޯ؟ އަދި އެއްވެސް ބަޔަކާއި ހަވާލުކޮށްފައިވާނަމަ ހަވާލުކުރީ ކޮންބަޔަކާއިތޯ؟ އަދި ކޮންއަގަކަށްތޯ؟ އަދި މިމަސައްކަތްކޮށް ބަޖެޓް އެލޮކޭޓް ކުރުމަށް ބޭއްވި ކައުންސިލް ބައްދަލުވުމެއް ބޭއްވިފައިވާނަމަ އެބައްދަލުވުމުެ ޔައުމިއްޔާ އަދި ބިޑުގެ ތަފްސީލް

- ކައުންސިލުން ރަށު ރައްޔިތުންނަށް އެންގުންތައް އެންގުމަށް ބޭނުންކުރާ ތާޅަފިލި ހަރުކުރާ އެންޓަނާ ހަރުކުރުމަށް ބުޑެއް އެޅުމަށް އިއުލާނެއްކުރިތޯ؟ އިއުލާނުކުރި ނަމަ އިއުލާނުކޮށް ހަވާލުކުރީ ކޮން ކުންފުނިއަކާއިތޯ؟ އަދި ކޮންއަގަކަށްތޯ އަދި ކޮން މުއްދަތެއްގެ ތެރޭގައި ނިންމަންތޯ؟ 

- ކައުންސިލްގެ ބިޑް ކޮމޮޓީއެއް އެކުލަވާލާ އެކޮމިޓީ މިނިސްޓްރީ އޮފް ފިނޭންސަށް ހުށައަޅައި ފައިވޭތޯ؟ އަދި ބިޑްކޮމިޓީ އެކުލަވާލަން ކައުންސިލް ބައްދަލުވުމެއް ބާއްވާ ފާސްކުރެ ވިފައިވާނެތޯ؟

- ކޮލަމާފުށީ ބަނދަރު ސަރަހައްދުގައި އިންދާފައިވާ ކަނދުރު ރުއް ގެނައުމަށް ކައުންސިލް ޖަލްސާއެއްބާއްވާ އެކަމަށް ބަޖެޓެއް އެލޮކޭޓްކުރެވުނުތޯ؟ އެ ކައުންސިލް ބައްދަލުވުމުގެ ޔައުމިއްޔާ އަދި މިބައްދަލުވުމާއި ހަވާލާދީ ކުރެވުނު އިއުލާނެއްވޭތޯ ވާނަމަ އިއުލާނާއި އަދި އިއުލާނާއި ގުޅިގެން ހުށެއެޅި ބިޑްތަކުގެ ތަފްސީލް އަދި މި މަސައްކަތް ހަވާލުކުރި ކުންފުންޏާއި ހަވާލުކުރެވުނު އަގުގެ ތަފްސީލް

- ކޮލަމާފުށީ ބަނދަރުމަތީގައި ކައުންސިލްގެ ހަރަދުގައި ހަދަމުންދާ މަރިޔާދުގެއަށް ކައުންސިލުން މިމަސައްކަތަށް ހަރަދުކޮށްފައިވަނީ ކިހާ މިންވަރެއްތޯ؟ މަސައްކަތްކުރުމަށް އެއްވެސް ބަޔަކާއި ހަވާލުކޮށްފައިވާނަމަ ހަވާލުކުރީ ކޮންބަޔަކާއިތޯ؟ އަދި ކޮންއަގަކަށްތޯ؟ 

މީގެ އިތުރުން 2021 ވަނަ އަހަރުން ފެށިގެން ކޮލަމާފުށި ޔޫތު ރެކްރިއޭޝަން ސެންޓަރުގެ ބަޖެޓް ބޭނުންކޮށްފައިވަނީ ކޮންގޮތަކަށްތޯއާއި އަދި ހަރަދުކޮށްފައިވަނީ އަހަރަކަށް ކިހާވަރަކަށް އަދި ކޮން ކަމަށްކަން ހޯދުމަށް ވަނީ އެދިފަ އެވެ. އަދި ހަމަ އެ އަހަރުން ފެށިގެން ކޮލަމާފުށި މަގުބައްތިތައް ބަލަހައްޓަން ހަވާލުކުރުމަށް އިއުލާނެއް ކޮށްފައިވޭތޯއާއި  މި މަސައްކަތް ހަވާލުކޮށްފައިވަނީ ކޮން ކުންފުނިތަކާއިތޯ އަދި އެއީ ކޮން އަގަކަށް ތޯ އޮޅުން ފިލުވުމަށް ވަނީ އެދިފަ އެވެ. 

މީގެ އިތުރުން 2021 ވަނަ އަހަރުން ފެށިގެން ކޮލަމާފުށި އިޖްތިމާއީ ސަރަހައްދު ކުނިކަހާ ސާފުކުރުމަށް ހަވާލުކުރުމަށް އިއުލާނެއް ކޮށްފައިވޭއާއި އެ މަސައްކަތް ހަވާލުކުރެވުނު ކުންފުނިތަކާއި އަގުތައް އޮޅުންފިލުވައިދިނުމަށް ވެސް ވަނީ އެދިފަ އެވެ.