މާލޭ ސިޓީގެ މޭޔަރުކަމަށް ޕީއެންސީން ވާދަކުރައްވާ މޫސާ އަލީ ޖަލީލަކީ ފަސްބައި ސާފު އަދި ހިދުމަތުގައި އުމުރު ދުވަސް ހޭދަކުރެއްވި ބޭފުޅެއްކަން ފާހަގަކުރެއްވުމާއެކު، އޭނާގެ ފަހަތްޕުޅުގައި އޮތް ޕީއެންސީގެ ޓީމަކީ ގާބިލު ޓީމެއްކަމަށް މާލޭ ސިޓީ ގުރޫޕް އޮފް ހޮސްޕިޓަލްސްގެ ސީއީއޯ އަބްދުއްރައްޒާގް ހަލީމު ވިދާޅުވެއްޖެއެވެ. 

މިއަދު މައްޗަންގޮޅި އުތުރުގައި ކޮންގްރެސް ޕާޓީން ކުރިއަށްގެންދިޔަ ދޮރުން ދޮރަށް ހަރަކާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުގައި އެ ސަރަހައްދުގައި ހުންނަވައި އެމްއެމްޓީވީއަށް ދެއްވި ބަސްދީގަތުމެއްގައި ހަލީމު ވިދާޅުވީ އޭނާ ރައީސްގެ އަރިހުގައި ދޮރުން ދޮރަށް ހަރަކާތްތަކުގައި ބައިވެރިވެވަޑައިގަންނަވާއިރު ރައްޔިތުންގެ ފަރާތުން ލިބެމުންދަނީ ވަރަށް އުފާވެރި އިޝާރާތްތަކެއް ކަމަށެވެ. 

އެގޮތުން ރައީސަކީ ރާއްޖޭގައި ކުރިން ވެރިކަން ކުރެއްވި އެހެން ބޭފުޅުންނާ ހިލާފަށް ރައްޔިތުންނާ ގާތުން ވެރިކަންކުރައްވާ، ރައްޔިތުންގެ ހިޔާލާއާއި މަޝްވަރާ ހޯއްދަވައިގެން މަސައްކަތްކުރައްވާ ބޭފުޅެއްކަން ރައްޔިތުން ބަލައިގަނެފައިވާކަމަށް ހަލީމު ވިދާޅުވިއެވެ. 

ހަލީމުވަނީ މާލެ ސިޓީގެ މޭޔަރުކަމަށް ކޮންގްރެސް ޕާޓީގެ ޓިކެޓުގައި ވާދަކުރައްވާ މޫސާ އަލީ ޖަލީލަކީ ހުރިހާ ދިވެހިން އެ ބޭފުޅަކަށްޓަކައި ފަހުރިވެރިވާ، ފަސްބައި ސާފު ހިދުމަތުގެ ދިގު މާޒީއެއް އޮތް، އެ މާޒީގައި ކިލަނބުކަމެއް ނެތް ބޭފުޅެއްކަމަށް ވިދާޅުވެފައެވެ. 

"މޫސާ އަލީ ޖަލީލަކީ ގައުމީ ބަތަލެއް. އެބޭފުޅގެ ފަސްބައި ވަރަށް ސާފު، އެއްވެސް ކަހަލަ ނުސާފުކަމެއް ނެތް ބޭފުޅެއް. މުޅި އުމުރު ގައުމަށް ހިދުމަތްކުރެއްވި ބޭފުޅެއް. އަޅުގަނޑުމެންނަށް ލިބުނީ ވަރަށް ރަނގަޅު ޕްރޮޑަކްޓެއް. މޫސާ ޖަލީލާއެކު ވާދަކުރައްވާ މުޅި ޓީމަކީ ގާބިލު ކިޔަވައިގެން ތިބި ޓީމެއް،" ހަލީމު ވިދާޅުވިއެވެ. 

ލާމަރުކަޒީ ގާނޫނުގައި އިންތިޒާމުތައް ތަރުތީބުކޮށްފައި އޮންނަ ގޮތަށް އިޝާރަތްކުރައްވަމުން ހަލީމު ވިދާޅުވީ ކައުންސިލަރުން ކިތަންމެ މަސައްކަތްކުރެއްވިޔަސް ކަންކަން އަވަސްކުރުމާއި ފަސްކުރުމުގެ އެންމެ ފަހުގެ ބާރު މިއޮންނަނީ ކައުންސިލުތަކުގެ މޭޔަރުންނާއި ރައީސުންގެ އަތްޕުޅުގައި ކަމަށެވެ. 

އެހެންކަމުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މާލެ ސިޓީއާމެދު ގެންގުޅުއްވާ ތަސައްވުރު ހަލުއިކޮށް ތަންފީޒުކުރުމަށްޓަކައި މާލޭ ސިޓީގެ އަޣުލަބިއްޔަތު ޕީއެންސީއަށް ލިބުމާއެކު، މާލެ ސިޓީގެ މޭޔަރުކަމަށް އެ ޕާޓީގެ ކެންޑިޑޭޓު އިންތިހާބުވުމަކީ ވަރަށް މުހިއްމު ކަމެއް ކަމުގައި ހަލީމު ފާހަގަކުރެއްވިއެވެ. 

ހަލީމު ވިދާޅުވީ ސަރުކާރުތަކާ އެއްކޮޅަށް ކައުންސިލުތައް އޮތުމަކީ ލާމެހިފައިވާ ގޮތެއްގައި ސަރުކާރުގެ ހިދުމަތްތައް ރައްޔިތުންނަށް ފޯރުކޮށްދިނުމަށް ލިބިގެންދާ ބާރެއްކަން ކުރީގައި ވެރިކަން ކުރެއްވި ބޭފުޅުންނާއި ޕާޓީތަކުންވެސް ވެރިކަމުގައި ތިބޭއިރު ގަބޫލުކުރެއްވި ކަމަށެވެ. 

އަދި ކައުންސިލުތަކުގެ ޒިންމާއަކީ ސަރުކާރު ޖަވާބުދާރީކުރުވުން ނޫންކަމާއި ސަރުކާރާ ގުޅިގެން ރައްޔިތުންނަށް ހިދުމަތް ދިނުންކަން ފާހަގަކުރައްވަމުން ހަލީމު ވިދާޅުވީ މާލޭ ސަރަހައްދަށް ބޭނުންވާ ކުރިއެރުން ގެނެސް، މި ސަރަހައްދުގައި ހުރި މައްސަލަތައް ހައްލުކުރުމުގައި ރަނގަޅު ނަތީޖާއެއް ނެރެވޭނީ ކޮންގްރެސް ޕާޓީގެ ކެނޑިޑޭޓުން ހޮވައިގެން ކަމަށްވެސް ހަލީމު ވިދާޅުވިއެވެ.