މަސްވެރިން ކިރުވާ މަހަށް އަގު އިތުރުކުރުމުގެ މަސައްކަތް ވަރަށް ހަލުއިކޮށް ކުރިއަށްދާކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެއެވެ. 

އެ ވުޒާރާއިން ކުރަމުންދާ މަސައްކަތްތަކުގެ އެންމެ ފަހުގެ މައުލޫމާތު ހިއްސާކުރެއްވުމަށް މިއަދު ބޭއްވެވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ ރާއްޖޭގެ މަސް ޕްރޮސެސްކުރެވޭ މިންވަރު އިތުރުކުރުމަށް ޕްރޮސެސްކުރުމުގެ ގާބިލުކަން އިތުރުކުރުމަކީ ކުރީގެ ސަރުކާރުތަކުގައިވެސް ދެކެވުނު ވާހަކައެއް ނަމަވެސް އެކަށީގެންވާ މަސައްކަތްތަކެއް ނުކުރެވުމުގެ ސަބަބުން ޕްރޮސެސްކުރުމުގެ ގާބިލުކަން އިތުރުކުރެވިފައި ނެތް ކަމަށެވެ. 

މަސްވެރިކަމުގެ ސިނާއަތަށް އަދި އެ ސިނާއަތުގައި ހަރަކާތްތެރިވާ މަސްވެރިންނަށް އެކަށީގެންވާ ރަނގަޅު އާމްދަނީއެއް ލިބޭނީ ކިރުވާ މަހަށް އެގު އެއްކުރުމަށްފަހު ބޭރުކުރެވިގެންކަން ފާހަގަކުރައްވައި ޝިޔާމު ވިދާޅުވީ އަމިއްލަ ކުންފުނިތަކާއި މިފްކޯ ހިމެނޭހެން ރާއްޖޭގައި މިހާރު ޕްރޮސެސްކުރެވެނީ 105 ޓަނ ކަމަށެވެ. ޝިޔާމު ވިދާޅުވީ އެކަމުގައި ރައީސްގެ އަމާޒަކީ މަސް ޕްރޮސެސްކުރެވޭ މިންވަރު އިތުރުކުރުމަށް ބޭނުންވާ ވަސީލަތްތައް ގާއިމުކުރުން ކަމަަށެވެ. 

އެ އަމާޒަށް ކުރެވެމުންދާ މަސައްކަތްތަކުގެ ތަފުސީލު ދެއްވަމުން ވަޒީރު ވިދާޅުވީ މިހާރު ފެލިވަރުގައި ހުރި 50 ޓަނުގެ މަސް ޕްރޮސެސްކުރާ ކާރުހާނާގެ އިތުރަށް، އިތުރު 100 ޓަނުގެ މަސް ޕްރޮސެސްކުރެވޭނެ އައު ކާރުހާނާއެއް ގާއިމުކުރުމުގެ މަސައްކަތް މިހާރު ކުރެވެމުންދާ ކަމަށެވެ. 

އަދި ގދ.ފިޔޯރީގައި 100 ޓަނުގެ އައިސްޕްލާންޓަކާއެކު، ދުވާލަކު 100 ޓަނުގެ މަސް ދަޅުގައި ބަންދުކޮށް، 100 ޓަނުގެ ފިޝްމީލް އުފެއްދޭ ކާރުހާނާއެއް ގާއިމުކުރުމަށް ބޭނުންވާ ބިން ހިއްކުމާއި އެކަމަށްޓަކައި އެ ރަށުގެ ބަނދަރަށް ގެންނަންޖެހޭ ބަދަލުތައް ގެނައުމުގެ މަޝްރޫއު ފެށިގެން ކުރިއަށްދާ ކަމަަށެވެ. 

ނިލަންދޫގައި 50 ޓަނުގެ މަސް ބަންދުކުރާ ކާރުހާނާއެއް ގާއިމުކުރުމަށް ބޭނުންވާ ބިން ހިއްކުމުގެ މަސައްކަތް ދެ ދުވަހެއްހައި ދުވަހުގެ ތެރޭގައި ފެށިގެންދާނެ ކަމަށާއި މި މަހުގެ އަށްވަނަ ދުވަހު މަސައްކަތް ފެށުމަށް އީއައިއޭ ހުއްދަަވެސް ލިބިފައިވާކަމަށް ވަޒީރު ވިދާޅުވިއެވެ. 

އަދި ސ.ހުޅުދޫގައި ބޮޑުކަންނެލި ޕްރޮސެސްކުރާ މަސްކާރުހާނާއެއް ގާއިމުކުރުމުގެ މަސައްކަތްވެސް ފެށިގެން ކުރިއަށްދާކަން ވަޒީރު ފާހަގަަކުރެއްވިއެވެ. 

"އަޅުގަނޑު ކުރިން ދެންނެވިހެން ކޯލްޑް ސްޓޮރޭޖު ކެޕޭސިޓީ އިތުރުވެގެން މިދަނީ 9،500 ޓަނުން 25،000 ޓަނަށް އަދި ޕްރޮސެސިން ކެޕޭސިޓީ އިތުރުވެގެން މިދަނީ 105 ޓަނުން 300 ޓަނަށް ދުވާލަކަށް ޕްރޮސެސްކުރެވޭ މިންވަރަށް މި ޕްރޮޖެކްޓުތައް ނިންމައިލުމުން އެ ގާއިމުކުރެވުނީ،" ޝިޔާމު ވިދާޅުވިއެވެ. 

މި ޖަނަވަރީ ދިހަވަނަ ދުވަހުން ފެށިގެން މިފްކޯއަށް ބޮޑުކަންނެލި ގަންނަން ފަށާފައިވާކަމަށާއި، އެއީ ރައީސްގެ ވައުދުފުޅެއްކަމަށާއި، އަދި ހުޅުމާލެއިން ބޮޑުކަންނެލި ގަނެ ޕްރޮސެސްކުރާނެ ކާރުހާނާއެއް ގާއިމުކުރުމުގެ މަސައްކަތްވެސް ވައުދުވެވަޑައިގެންފައިވާ ގޮތަށް ކުރިއަށް ގެންގޮސް މި އަހަރު ތެރޭގައި އެތަނުން ހިދުމަތް ދިނުމަށް ސަރުކާރުން އަމާޒު ހިފާފައިވާކަމަށް ވަޒީރު ވިދާޅުވިއެވެ.