ކުރީން ކަނޑައަޅާފައިވާ ގޮތަށް މި އަހަރުގެ ޖޫން މަހުގެ ކުރީން ހުރިހާ އަތޮޅެއްގައި ރާއްޖެ ޓްރާސްޕޯޓް ލިންކް (އާރުޓީއެލް) ފެރީގެ ޚިދުމަތް ފެށޭނެ ކަމަށާ މި މަސް ނިމުމުގެ ކުރީން އިތުރު ދެ އަތޮޅެއްގައި ޚިދުމަތް ފެށުމަށް ތައްޔާރު ވަމުންދާ ކަމަށް ޓްރާސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެ އެވެ.

ކުރީން ކަނޑައަޅާފައި އޮތް ތާރީޚަށް ވުރެ މާކުރީން މުޅި ރާއްޖެއަށް އާރުޓީއެލް ޚިދުމަތް ފުޅާކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަމާޒެކެވެ. އެމަނިކުފާނުގެ އަމާޒަކީ މި އަހަރުގެ ޖޫންގެ ކުރީން ހުރިހާ އަތޮޅުތަކެއްގައި އާރުޓީއެލްގެ ޚިދުމަތް ފެށުމެވެ.

މިނިސްޓަރު އަމީން ވިދާޅުވި ގޮތުގައި މިހާރު ކަނޑައަޅާފައިވާ ގޮތަށް ޖޫން މަހުގެ ކުރީން ހުރިހާ އަތޮޅެއްގައި އާރުޓީއެލްގެ ޚިދުމަތް ފެށޭނެ އެވެ. އެކަމަށްޓަކައި ވާން ޖެހޭ ހުރިހާ ތައްޔާރީތަކެއް ކުރަމުންދާ ކަމަށް ވިދާޅުވި އެވެ.

އެގޮތުން މި މަސް ނިމުމުގެ ކުރީން އިތުރު ދެ އަތޮޅެއްގައި އާރުޓީއެލް ފެރީގެ ޚިދުމަތް ފެށުމަށް ދަނީ މަސައްކަތް ކުރަމުންނެވެ. އެއީ މ އަތޮޅާއި ލ އަތޮޅުގަ އެވެ.

މިހާރުވެސް 14 އަތޮޅެއްގައި އެ ޚިދުމަތް ވަނީ ފަށާފަ އެވެ. އެއާއެކު 133 ރަށެއް ވަނީ އާރުޓީއެލްގެ ޚިދުމަތުން ގުޅާލާފަ އެވެ. މި ޚިދުމަތް އެންމެ ފަހުން ފެށީ ފ އަތޮޅާއި ދ އަތޮޅުގަ އެވެ.