އަމާޒަކީ ޕަބްލިކް ޕްރައިވެޓް ޕަރޓްނަރޝިޕްގެ ދަށުން 5,000 އެފޯޑެބަލް ހައުސިން ޔުނިޓް ގާއިމުކުރުން ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު އަބްދުﷲ މުއްތަލިބް ވިދާޅުވެއްޖެ އެވެ. 

މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި "އެމްއެމްޓީވީ" އިން ކުރި ސުވާލަކަށް ދެއްވި ޖަވާބުގައި ވަޒީރު ވިދާޅުވީ ސަރުކާރުގެ "ބޯހިޔާވަހިކަން އެންމެންނަށް" ސިޔާސަތު ބައްޓަންކުރެވިފައިވަނީ މުޖުތަމައުގައި ތިބި އެންމެންނަށް ބޯހިޔާވަހިކަން ކަށަވަރުވާ ގޮތަށް ކަމަށެވެ. 

އެގޮތުން މިދިޔަ ހަފްތާގައި ޕަބްލިކް ޕްރައިވެޓް ޕަރޓްނަރޝިޕްގެ ދަށުން ހުޅުމާލެ ތިން ވަނަ ފިޔަވަހީގައި 1،000 ހައުސިންގ ޔުނިޓް އަޅައިދޭނެ ބަޔަކު ހޯދުމަށް އިއުލާނު ކުރެވިފައި ވާކަން ހާމަކުރައްވައި މި މަޝްރޫޢު ކުރިއަށް ގެންދާނީ "އެފޯޑަބަލް ހޯމް އޯނަޝިޕް" މޮޑެލްއަށް ކަމަށް ވަޒީރު ވިދާޅުވި އެވެ. 

މި ހައުސިން ޔުނިޓުތައް ދޫކުރުމުގެ ސަބަބުން ކުލި ބޮޑުވަމުން އަންނަ އައުމަށް ހައްލެއް ގެނައުމަށް ސަރުކާރަށް ފަސޭހަވެގެންދާނޭ ކަމަށް ވެސް ވަޒީރު ވިދާޅުވި އެވެ. 

ހުޅުމާލެ ތިން ވަނަ ފިޔަވަހީގައި 1،000 ހައުސިން ޔުނިޓް ގާއިމުކުރަން އިއުލާނުކޮށްފައިވާއިރު މިއީ އެކި ފަންތިއަށް އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ގެންގުޅުއްވާ ތަޞައްވުރުގެދަށުން ކުރިއަށް ގެންދިއުމަށް ނިންމާފަވާ މަޝްރޫއެކެވެ. އަދި މިއީ  ބޯހިޔާވަހިކަމުގެ މިންގަނޑުތަކުގެ ތެރެއިން، އެންމެ އަސާސީ މިންގަނޑަށްވުރެ މަތިން ކުރިއަށްގެންދާ ކެޓަގަރީއެކެވެ. 

ބޯހިޔާވަހިކަމުގެ މައްސަލައަށް ދާއިމީ ހައްލު ގެނައުމުގެ މަސައްކަތް ސަރުކާރުން ކުރަމުން އަންނައިރު "ބޯހިޔާވަހިކަން އެންމެނަށް" ސިޔާސަތުގެ ދަށުން ފުރަތަމަ އިޢުލާނުކޮށްފަވާ 7900 ހައުސިންގ ޔުނިޓްވެސް ދޫކުރުމަށް ހަމަޖެހިފަވަނީ މާލެ ސަރަހައްދުން ނެވެ.