ކުރީ ސަރުކާރުން ހިންގި ބިންވެރިޔާ ސްކީމުގެ އުސޫލު އޮތް ގޮތުން އުފެދިފައި ހުރި ބައެއް މައްސަލަތައް ހައްލުކުރުމަށް ހާއްސަ އުސޫލުތަކެއް އެކުލަވައިލާ މިއަދު އެ އުސޫލުތައް އިއުލާނުކުރާނެކަން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން ބުނެފިއެވެ. 

އެ ވުޒާރާގެ މަސައްކަަތްތަކުގެ އަދާހަަމަ މައުލޫމާތު ދެއްވުމަށް ވަޒީރު ޑރ.އަބްދުﷲ މުއްތަލިބު މިއަދު ރައީސް އޮފީހުގައި ކުރިއަށްގެންދެވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ މައިގަނޑު ގޮތެއްގައި ބިންވެރިޔާ ސްކީމުގެ ތެރެއިން ފެންމަތިވެފައި އޮތް ދެ މައްސަލައަކަށް ހައްލު ހޯދުމަށް ސަރުކާރުން އައު އުސޫލުތަކެއް އެކަށައަޅައި އިއުލާނުކުރުމަށް ނިންމާފައިވާ ކަމަށެވެ. 

ބިންވެރިޔާ ސްކީމު ހިންގިއިރު ގުޅިގެން ކުރިމަތިލައިގެން ނޫނީ ބިން ނުލިބޭނެ ކަމުގައި އެއިރު ދެކެވެމުންދިޔަ ވާހަކަތަކާއި ރަސްމީކޮށް ބައެއް މަސްއޫލުވެރިން އެގޮތަށް މައުލޫމާތު ދިނުމުގެ ސަބަބުން ވަރަށް ގިނަ މީހުން ބިމަށް ނުވަތަ ގޯއްޗަށް ކުރިމަތިލީ އާއިލާ އެކުގައެވެ. 

ވަޒީރު ވިދާޅުވީ މިގޮތަށް މަޖުބޫރީ ހާލަތުގައި ޖޮއިންޓްވެގެން ގެދޮރަށް ކުރިމަތިލީ ފަރާތްތައް މިހާރު ބިން ލުބުމަށްފަހު ވަކިވާން ބޭނުންވެގެން ހުށަހަޅަމުންދާ ކަމަށެވެ. އެ މައްސަލަ ހައްލުކުރުމުގެ ގޮތުން ބިންވެރިޔާ ހާއްސަ ސްކީމެއް އިއުލާނުކޮށް ޖޮއިންޓުކޮށް ލިބުނު އެންމެން އެ ލިބުނު ބިން ދޫކޮށްލަން އެއްބަސްވާނަމަ ވަކި ބިން ހޯދުމަށް ކުރިމަތިލުމުގެ ފުރުސަތު ދިނުމަށް ނިންމާފައިވާކަން ވަޒީރު އިއުލާނުކުރެއްވިއެވެ. 

"ގޯތި ލިބިފައި އޮތް ހުރިހާ ފަރާތްތަކަކުން ގޯތި ދޫކޮށްލުމަށް އެއްބަސްވާކަމުގައިވާނަމަ، ކޮންމެ މީހަކަށް ވަކި ޕްލޮޓެއް ލިބޭ ގޮތަށް އެޕްލައިކުރެވޭނޭ،" މުއްތަލިބު ވިދާޅުވިއެވެ. 

މި ސްކީމުގެ ދަށުން ދެން ފެންމަތިވި މައްސަލައަކީ ބިންވެރިޔާ ސްކީމަށް ޝަރުތު ހަމަވާ މީހުންގެ ތެރެއިން ފުލެޓެއް އޮތުމުގެ ސަބަބުން ކުރިމަތިނުލެވޭ މީހުންގެ މައްސަލައެވެ. މުއްތަލިބު ވިދާޅުވީ މާލޭގައި ބިން ނުވަތަ ގޯތި ދިނީ އެތައް ޒަމާނެއް ވަންދެން ގޯތި ދެވިފައި ނެތުމުގެ ސަބަބުން ގޯތި ބަހަމުން ފަޅިކުރަމުން ގޮސް ވަރަށް ދަތި ކުޑަ ޖާގަތަކުގައި މީހުން ދިރިއުޅެންޖެހިފައި އޮތުމުން ކަމަށެވެ. 

އެގޮތަށް އެއް އާއިލާއެއްގައި ފުލެޓެއް އޮތް މީހަކަށް ބިން ނުލިބި އާއިލާގެ ބާކީ އެންމެންނަށް ފުލެޓު ލިބުމުގެ ޝަކުވާ ވަރަށް ބޮޑަށް ލިބިފައިވާ ކަމަށެވެ. އެހެންކަމުން މިހާރު ހުޅުވައިލާ ދެވަނަ ސްކީމަކީ ބިންވެރިޔާ ސްކީމަށް ޝަރުތު ހަަމެވެ، ފުލެޓެއް އޮތުމުގެ ސަބަބުން ބިން ނުލިބުނު މީހުންނަށް ފުލެޓު ދޫކޮށްލާ ގޮތަށް ބިމަށް ކުރިމަތިލުމަށް ހުޅުވައިލާ ފުރުސަތެއް ކަމުގައި ވަޒީރު ވިދާޅުވިއެވެ. 

"ވަރަށް ސްޕެސިފިކް ކެޓަގަރީއަކަށް ފުރުސަތު ދެނީ. އެއީ ބިންވެރިޔާ ސްކީމުގެ ޝަރުތުތައް ފުރިހަމަވީ ނަމަވެސް ސަރުކާރުން ދިން ފުލެޓެއް އޮތުމުން ބިމަށް ކުރިމަތިނުލެވުނު ފަރާތްތަކަށް ފުރުސަތު މިދެނީ އެ ފުލެޓު ސަރުކާރަށް ދޫކޮށްލާފައި ބިމަކަށް ކުރިމަތިލާން. މާނައަކީ ބިން ލިބޭ ހިސާބުން އެ ފުލެޓު ސަރުކާރާ ހަވާލުކުރަންޖެހޭނޭ،" މުއްތަލިބު ވިދާޅުވިއެވެ. 

ވަޒީރު ވިދާޅުވި ގޮތުގައި މި ދެ ސްކީމު ހިންގުމަށް އެކަށައަޅާ އުސޫލު މިއަދު އާއްމުކުރެވިގެންދާނެއެވެ.