ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ހއ. ދިއްދޫގައި ތަރައްޤީކުރުމަށް ހަމަޖެހިފައިވާ އިންޓަރނޭޝަނަލް ސްޓޭޑިއަމްގެ މަސައްކަތްކުރުމަށް އެމްޓީސީސީއާ ހަވާލުކޮށްފިއެވެ.

ކުޅިވަރާއި ހަށިހެޔޮކަމާ ބެހޭ ވުޒާރާގައި ބޭއްވި ރަސްމިއްޔާތެއްގައި މި މަސައްކަތުގެ އެއްބަސްވުމުގައި ކުޅިވަރު ވުޒާރާގެ ފަރާތުން ސޮއިކުރެއްވީ ވަޒީރުގެ ނައިބު މުޙައްމަދު ފަޔާޒް އެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރ، މުޙައްމަދު ޖަމްޝީދު އެވެ. މި ރަސްމިއްޔާތުގައި ދިއްދޫ ދާއިރާގެ ރައްޔިތުންގެ މަޖިލީހުގެ މެންބަރު ޢަބްދުލް ލަތީފް މުޙައްމަދު ބައިވެރިވެވަޑައިގެންނެވިއެވެ.

އެމްޓީސީސީން ބުނީ، މި މަޝްރޫޢުގެ ދަށުން ދިއްދޫ ފުޓްބޯޅަ ދަނޑުގެ ސަބްބޭސް ތައްޔާރުކޮށް، ޕިޗު ހަދައި، ބައުންޑަރީ ފާރު އިމާރާތްކޮށް، ފެންސް ޖަހައި، ލައިޓިންގ ސިސްޓަމް ހަރުކުރުމުގެ އިތުރުން ރޮސްޓްރަމް ހެދުމުގެ މަސައްކަތް ހިމެނޭ ކަމަށެވެ. މި ހުރިހާ މަސައްކަތެއް ވެސް ކުރުމަށް ހަމަޖެހިފައި ވަނީ ފީފާ އެޕްރޫވްޑް މިންގަނޑަށެވެ. މިއީ އުތުރުގައި އިމާރާތް ކުރާ ބައިނަލްއަގުވާމީ އެންމެ މަތީ ފެންވަރުގެ ސްޓޭޑިއަމަށް ވެގެން ދާނެއެވެ. 

ދިއްދޫ ފުޓްބޯޅަ ދަނޑުގެ މަސައްކަތްކުރުމަށް އެމްޓީސީސީއާ ހަވާލުކުރީ 360 ދުވަހުގެ ތެރޭގައި ނިންމާ ގޮތަށެވެ. 

ހއ. އަތޮޅުގެ އެންމެ އާބާދީ ބޮޑު ދިއްދޫގައި ފުޓްބޯޅަ ދަނޑު ތަރައްޤީކުރުމުގެ މި މަޝްރޫޢުގެ މަސައްކަތް ނިމުމާއެކު، އެ ރަށުގެ ރައްޔިތުންނަށާއި އަތޮޅުގެ ރައްޔިތުންނަށް ގިނަގުނަ މަންފާތަކަކާއި ފަސޭހަތަކެއް ލިބިގެންދާނެ އެވެ.