އދ. މަހިބަދޫ ޕޮލިސް ސްޓޭޝަނުގެ ބެލުމުދަށުގައި ހުރި ބަނގުރާތަކެއް އެ ސްޓޭޝަނުން ނައްތާލައިފިއެވެ.

ފުލުހުން މިކަން ހާާމަކޮށް ބުނެފައިވަނީ، އެއީ އެކި މައްސަލައާއި ގުޅިގެން މަހިބަދޫ ޕޮލިސް ސްޓޭޝަނުގެ ބެލުމުގެ ދަށުގައި ހުރި ބަނގުރާތަކެއް ކަމަށެވެ.

މި މާރިޗު މަހުގެ 3 ވަނަ ދުވަހު މަހިބަދޫ ސްޓޭޝަނުން 33 ފުޅި ބަނގުރަލާއި 169 ދަޅު ބަނގުރާ ނައްތާލައިފައިވެއެވެ.

ބަނގުރާ ނައްތާލުން ކުރިއަށް ގެންގޮސްފައިވަނީ، ފުލުހުންގެ ބެލުމުގެދަށަށް ގެނެވޭ ބަނގުރަލާއި ބަނގުރަލުގެ މައްސަލަތަކާއި ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން ކަމަށް ފުލުހުން މައުލޫމާތުދެއެވެ.

ފުލުހުންގެ ބެލުމުގެ ދަށުގައި ހުންނަ މިފަދަ ތަކެތި އަބަދުވެސް ރައްކާތެރިގޮތުގައި އަންނަނީ ނައްތާލަމުންނެވެ. ބަނގުރަލުގެ އިތުރުން ފުލުހުންގެ ބެލުމުގެ ދަށަށް ގެންނަ ސިގިރެޓް ވެސް، ތަޙްޤީގީ މަރުޙަލާތައް ފުރިހަމަކުރުމަށް ފަހު އެ އިދާރާއިން ނައްތާލައެވެ.