ކައުންސިލުތައް ސަރުކާރުގެ ފަށަލައަކަށް ނުވުމުގެ ގެއްލުން ލިބެމުންދަނީ ދިވެހި ދައުލަތަށް ކަމަށް ހާރިޖީ ވަޒީރު ޑޮކްޓަރ ޢަބްދުﷲ ޚަލީލް ވިދާޅުވެއްޖެ އެވެ. 

ވަޒީރު މިފަދައިން ވިދާޅުވީ ކޮންގްރެސް ޕާޓީގެ ގަލޮޅު އުތުރު ދާއިރާގެ ޖަގަހަ ހުޅުވުމުގެ ހަފްލާގައި ވާހަކަފުޅު ދައްކަވަމުން ނެވެ. 

ލާމަރުކަޒީ ގާނޫނު ބުނެދެނީ ރައްޔިތުންނާ ގާތުން ހިދުމަތް ދިނުން ކަމަށް ވީއިރު ކޮންގްރެސް ޕާޓީގެ ޓިކެޓުގައި މިފަހަރުގެ އިންތިހާބަށް ކުރިމަތިލާފައިވާ ހުރިހާ ކެންޑިޑޭޓުންނަކީ ވެސް ރައްޔިތުންގެ އަޑު އަހާނެ ބައެއް ކަމާއި މެދަކު ޝައްކު ނުކުރައްވާ ކަމަށް ވަޒީރު ވިދާޅުވި އެވެ.

ކައުންސިލުތަކަކީ ސަރުކާރު ޖަވާބުދާރީ ކުރުވާ ބައެއް ނޫންކަން ހާމަކުރައްވައި ކައުންސިލުތައް ސަރުކާރުގެ ފަށަލައަކަށް ނުވުމުގެ ގެއްލުން ކުރިމަތިވަމުން ދަނީ ދިވެހި ދައުލަތަށް ކަމަށް އެމަނިކުފާނު ވިދާޅުވި އެވެ.  

ސަރުކާރުން ކުރަން ހުރި ކަންކަމަށް ހުރަސްއަޅާ ކައުންސިލުތައް ގާއިމުވެއްޖެނަމަ ތަރައްގީއަށް ހުރަސް އެޅޭނެކަމަށް ޚަލީލު ވިދާޅުވި އެވެ. 

މި ސަރުކާރަކީ އެއްވެސް ކަމެއް ރައްޔިތުންނަށް އޮޅުވާލާނެ ބައެއް ނޫންކަމަށާއި އެގޮތުން ބަލާއިރު އެމްޑީޕީ ސަރުކާރުން ރައްޔިތުންނަށް ވެފައިވާ ވައުދުތައް ވެސް ފުއްދަދެނީ މި ސަރުކާރުންކަމަށް ވަޒީރު ވިދާޅުވި އެވެ. 

ޚަލީލު ވަނީ އޭޕްރީލް މަހުގެ ހަތަރު ވަނަ ދުވަހުގެ ހެނދުނާ ނުކުމެ ޕީއެންސީގެ ކައުންސިލަރުންނަށް ވޯޓު ދީ އިންތިހާބު ބޮޑުތަނުން ނެގުމަށް ރައްޔިތުންނަށް އިލްތިމާސްކުރައްވާފަ އެވެ.