ކުރޫޒްލައިނާ "އެމްވީ ކޮސްޓާ ޑެލިޒިއޯސާ" އިން ހާހަކަށްވުރެ ގިނަ ފަތުރުވެރިން ރާއްޖެ އައިސްފިއެވެ.

މިއީ  ސްރީލަންކާގެ ކޮލަމްބޯ ބަނދަރުން ފުރައިގެން މިއަދު މާލެއަށް ބަނދަރުކުރި  ކުރޫޒްލައިނާ އެކެެވެ.

އިމިގްރޭޝަނުން ބުނީ "އެމް.ވީ. ކޮސްޓާ ޑެލިޒިއޯސާ" ނަމަކަށް ކިޔާ އުޅަނދުގައި ތިބި 1,855 ފަސިންޖަރުންނާއި 881 ފަޅުވެރިންނަށް، މިއަދު ކުލިއަރެންސްގެ ކަންކަން ފުރިހަމަކޮށްދީފައި ވާކަމަށެވެ.

ލަންކާ ގެ ބަނދަރުން ފުރައިގެން ރާއްޖެއަށް އެންމެ ފަހުން ކުރޫޒްލައިނާ އެއް އައިސްފައިވަނީ މިދިޔަ މަހުގެ 15 ވަނަ ދުވަހުއެވެ. އެދުވަހު 1918 ފަތުރުވެރިން އައެވެ. އޭގެ ފަހުން 18 ވަނަ  އެދުވަހު 500 އެއްހާ ފަތުރުވެރިން އައެވެ.

މިއަހަރަކީ ރާއްޖެއަށް ރެކޯޑު އަދަދަކަށް ފަތުރުވެރިން އަންނަ އަހަރެކެވެ. އެގޮތުން އެއްދުވަހެއްގެ މައްޗަށް  އެންމެ ގިނަ ފަތުރުވެރިން އަންނަ މިންވަރު އައީ އެއްދުވަހުން އަނެއްދުވަހަށް ރެކޯޑު މުގުރަމުންނެވެ. ނަމަވެސް މެދު އިރުމަތީގައި މިހާރު ފެށިގެން އުޅޭ ހަނގުރާމައިގެ ސަބަބުން  އެ ސަރަހައްދުގެ ގިނަ އެއާޕޯޓު ތަކެއް ވަގުތީގޮތުން ވަނީ ބަންދުކޮށްފައެވެ. އޭގެ ސަބަބުން ރާއްޖެއަށް ވައިގެމަގުން އަންނަ ފަތުރުވެރިންގެ ނިސްބަތް ވަނީ 50  އިންސައްތަ ދަށަށް ގޮސްފައެވެ.

 މިފަދަ ދަނޑިވަޅެއްގައި ރާއްޖެއަށް ކުރޫޒްލައިނާތަކުން، ފަތުރުވެރިން އައުމަކީ ރާއްޖޭގެ ފަތުރުވެރިކަމުގެ ސިނާއަތަށް ލިބޭ ހިތްހަމަޖެހުމަކަށް ވާނެއެވެ.