ހުޅުމާލެ ފޭސް ދޭއްގައި ތިން ޕާކިން ބިލްޑިން އެޅުމުގެ މަސައްކަތް ތިން މަސް ތެރޭ ފަށާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ މިފަދައިން ވިދާޅުވީ ޞަލާހުއްދީން ސްކޫލުގައި ރޭ ފޭސް ދޭއްގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. 

ފޭސް ދޭއްގައި ހުންނަ ހިޔާ ޓަވަރުތަކުގައި ލިފްޓްތަކުގެ މަސައްކަތް ވެސް މިހާރު އޮތް ޝެޑިއުލްގައި އޮތްގޮތަށް އޭޕްރީލް މަހުގެ ނިޔަލަށް ނިމޭނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވިދާޅުވި ގޮތުގައި މިހާރު 6 ޓަވަރުގައި ވަނީ ލިފްޓް ހަރުކޮށް ޚިދުމަތްދޭން ފަށައިފައެވެ. ބާކީ ހުރިހާ ޓަވަރެއްގައި ލިފްޓް ހަރުކުރުމުގެ ޢަމަލީ މަސައްކަތް ދަނީ ކުރިއަށެވެ. 

ހިޔާ ޓަވަރުތަކަށް ޖެހޭ ޖުމްލަ އަދަދުން ދެލައްކަ ރުފިޔާ އުނިކުރަން މީގެކުރިން ނިންމާފައިވާއިރު، އެކަން ހަމަޖެހިގެންދާނެކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި، އެ އަދަދު އުނިކުރުމުން ކުލި ވެސް ދިގުމުއްދަތަކަށް ދައްކަންޖެހޭ ކުލި ކުޑަވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. 

ފޭސް ދޭއްގެ ރައްޔިތުންނާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި ރައްޔިތުން ހުށަހެޅި ކަންކަން ޙައްލުކުރައްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ. އެގޮތުން ޕާކުތައް ތަރައްޤީކުރުމާއި، މަގުތައް ހެދުމާއި ސެކިއުރިޓީ އިތުރަށް ރަނގަޅު ކުރުމުގެ މަސައްކަތް ފަށާފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ.