އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ރަސްމީކޮށް ރީބްރޭންޑްކޮށް ކުންފުނީގެ ނަން 'އެސްއެމްއީ ޑިޖިޓަލް' އަށް ބަދަލުކޮށްފިއެވެ. 

ކުންފުނީގެ ނަން ބަދަލުކުރީ 30 އޮކްޓޯބަރު 2025ގައި ބޭއްވި ކުންފުނީގެ ޚިއްސާދާރުންގެ ޚާއްސަގޮތުން ކުރާ އާންމު ޖަލްސާގައި ފާސްކޮށް، އެމްއެމްއޭގެ ހުއްދަ ހޯދުމަށްފަހު، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގައި ރަޖިސްޓްރީ ކޮށްގެން ކަމަށް އެސްއެމްއީ ޑިޖިޓަލްއިން ބުނެފައިވެއެވެ. 

އެ ކުންފުނިން އާއްމުކުރި ބަޔާނުގައި ބުނީ، އެސްއެމްއީ ޑިޖިޓަލް ވެގެންދާނީ ހުރިހާ ސިނާއަތެއްގައި ހަރަކާތްތެރިވާ ކުދި އަދި މެދުފަންތީގެ ވިޔަފާރިތަކަށް ބޭނުންވާ ތަފާތު އެކި ހިދުމަތްތައް ފޯރުކޮށްދޭ ޑިޖިޓަލް ޕްލެޓްފޯމަކަށް ކަމަށެވެ. 

ކުންފުނީގެ ހިދުމަތްތައް ދެން ބައްޓަންވެގެންދާނީ، ކުދި އަދި މެދުފަންތީގެ ވިޔަފާރިތަކަށް ފައިނޭންސިންގެ ހިދުމަތް ފޯރުކޮށްދިނުމުގެ އިތުރުން، އެ ވިޔަފާރިތަކުގެ މާލީ މުޢާމަލާތްތައް ރަނގަޅަށް ބެލެހެއްޓުމަށާއި، ވިޔަފާރީގެ ހިންގުންތެރިކަން މަތިކުރުމަށާއި، އަދި މާކެޓަށް ނުކުތުމަށް މަގުފަހިކޮށްދިނުމަށް އެހީތެރިވުމަށް ކަމަށް ބަޔާނުގައި ބުނެފައިވެއެވެ. 

ވިޔަފާރިތަކުގެ ދަތުރުގެ ކޮންމެ މަރުހަލާއަކަށް ބޭނުންވާ، އިންޓަގްރޭޓެޑް ވަސީލަތްތައް ފޯރުކޮށްދޭ މާލީ އިދާރާއަކަށް އެސްއެމްއީ ޑިޖިޓަލް ވެގެން ދާނެކަމަށް އެކުންފުނިން ވަނީ ބުނެފައެވެ. 

އެސްއެމްއީ ޑިޖިޓަލްއިން ބުނީ، ބީއެމްއެލްގެ ސަބްސިޑިއަރީއަކަށް ދާދި ފަހުން ބަދަލުވުމަށްފަހު، ބީއެމްއެލް އާއިއެކު ކުރެވޭ އިންޓެގްރޭޝަން މަސައްކަތްތަކުގެ ތެރެއިން ބީއެމްއެލްގެ މޯބައިލް ބޭންކިން އެޕާއި އޭޕީއައި އިން ގުޅުވާލައި ބީއެމްއެލްގެ މޮބައިލް އެޕްގެ ތެރެއިން އެސްއެމްއީ ޑިޖިޓަލްގެ ފެސިލިޓީތަކަށް ފައިސާ ދެއްކޭނެގޮތްވެސް މިހާރު ވަނީ ކަސްޓަމަރުންނަށް ފަހިކޮށްދީފައިވާ ކަމަށެވެ. 

ރާއްޖޭގެ އެކި ކަންކޮޅުތަކުގައި ތިބި ވިޔަފާރިވެރިންނާއި، ޚިދުމަތް ހޯދާ ފަރާތްތަކާއި، އަދި ވިޔަފާރީގެ ބައިވެރިން ގުޅުވައިދޭ ކުންފުނީގެ މޯބައިލް އެޕްލިކޭޝަން ވަރަށް އަވަހަށް ތަޢާރަފްކުރާނެ ކަމަށް އެކުންފުނިން ވަނީ ބުނެފައެވެ. 

ނަން ބަދަލުކުރުމާ ގުޅިގެން، އެ ކުންފުނީގެ ޚިދުމަތް ހޯދާ ކަސްޓަމަރުންނަށް ދޫކޮށްފައިވާ ފެސިލިޓީތަކުގެ ޝަރުތުތަކާއި ތަފްސީލުތައް ކުރިން އެއްބަސްވެފައިވާ ގޮތަށް އެއްވެސް ބަދަލެއް ނެތި ދެމިއޮންނާނެ ކަމަށް ކުންފުނިން ބުނެފައިވެއެވެ. 

އެކަމަކު އާ ބްރޭންޑިން އަދި ސިސްޓަމް އިންޓަގްރޭޝަންތަކާ ގުޅިގެން، ކުންފުނީގެ އާންމު ޝަރުތުތަކާއި މާއްދާތައް ހިމެނޭގޮތަށް އަދާހަމަ ކުރެވިފަިއވާކަމަށް އެސްއެމްއީ ޑިޖިޓަލްގެ ބަޔާނުގައި ބުނެފައިވެއެވެ.