އެމްޑީޕީގެ މިދިޔަ ވެރިކަމުގައި ހުޅުވާލި ގެދޮރުވެރިޔާ ސްކީމްގެ ދަށުން ފްލެޓަށް އެދި ހުށަހެޅި މީހުންނަށް ޕޮއިންޓް ދިނުމުގައި އުސޫލާ ޚިލާފަށް އަމަލުކޮށްފައިވާ މައްސަލައިގައި އޭރުގެ ސްޓޭޓް މިނިސްޓަރ އަކްރަމް ކަމާލުއްދީން ހިމެނޭހެން ހަތަރު މީހަކަށް ދައުވާ ކުރުމަށް ޕްރޮސިކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހަޅައިފިއެވެ. 

ޕީޖީ އޮފީހުން މިއަދު މީޑިއާތަކާ ހިއްސާކުރި މައުލޫމާތުގައި ބުނެފައިވަނީ އެމީހުންނަށް ދައުވާކުރުމަށް އެދި ކްރިމިނަލް ކޯޓަށް ހުށަހެޅީ ސެޕްޓެމްބަރު 10 ވަނަ ދުވަހު ކަމަށެވެ. 

މި ހަތަރު މީހުންނަށް ކުރަނީ ދިވެހިރާއްޖޭގެ ޤާނޫނުލްޢުޤޫބާތުގެ 513 ވަނަ މާއްދާގެ ދަށުން ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާއެވެ. 

ޕީޖީ އޮފީހުން ބުނީ މައްސަލައާ ގުޅުންހުރި އިތުރު ބައިތައް ޕީޖީ އޮފީހުގެ ލަފައާއެކު އެންޓި-ކޮރަޕްޝަން ކޮމިޝަނާއި، ދިވެހި ފުލުހުންގެ ޚިދުމަތުން ތަހުގީގުކުރަމުންދާ ކަމަށެވެ. އެ މައްސަލަތައް ތަހްގީގުކޮށް ނިމުމުން ދައުވާކުރުމާމެދު ގޮތެއް ނިންމާނެކަމަށް ޕީޖީ އޮފީހުން ބުނެފައިވެއެވެ. 

މާލޭގައި ދިރިއުޅޭތާ 15 އަހަރުވީ މީހުންނަށް ކުރީ ސަރުކާރުން ހުޅުވާލި ފުރުސަތުގައި، ފްލެޓް ލިބޭ 4000 މީހުންގެ ލިސްޓު އާއްމުކުރިއިރު ބޮޑެތި ކަންބޮޑުވުންތައް ހުއްޓެވެ. އެގޮތުން، އުސޫލާ ޚިލާފަށް ގޯއްޗާއި ފްލެޓަށް އެދި ހުށަހެޅި ބައެއް ފަރާތްތަކަށް ޕޮއިންޓް ދީ، ފްލެޓް ލިބުމަށް ޝަރުތު ފުރިހަމަނުވާ މީހުންނަށް ފްލެޓް ދިންކަމުގެ ޝަކުވާ ބޮޑުވިއެވެ.